د کرنې وزارت کې د مخابراتي انتنونو د تثبیت غونډه ترسره شوه
۴ کب ۱۴۰۴ه.ش
۶ رَمَضانُ المُبارَک ۱۴۴۷ه.ق
د کرنې، اوبو لګولو او مالدارۍ وزارت کې د مخابراتي انتنونو د تثبیت او تنظیم په موخه غونډه د دغه وزارت د مالي او اداري مرستیال مولوي نورالدین عمیر په مشرۍ، د مالیې وزارت او د اراضۍ ریاست د چارواکو په حضور کې ترسره شوه.
په دې غونډه کې د مهمو موضوعاتو په اړه، له ډلې د مخابراتي انتنونو د موقعیت تثبیت، په ولایتونو کې د یادو انتنونو د سروې او تثبیت لپاره د عملي پلان جوړول، د ځمکو د اجارې قراردادونو تنظیم او د اړوندو عوایدو د راټولولو څرنګوالي په اړه بحث او د نظر تبادله وشوه. همداراز، دولتي ادارو ته د مخابراتي شرکتونو د پورونو د تصفیې او تادیې پر څرنګوالي هم ټینګار وشو.
د غونډې ګډونوالو د مخابراتي انتنونو دقیق تثبیت د دولتي شتمنیو د مدیریت د ښه والي، د عوایدو د زیاتوالي او د قراردادونو په بهیر کې د روڼتیا لپاره مهم وباله او د اړوندو ادارو ترمنځ یې پر لا زیاتې همغږۍ ټینګار وکړ.
په پای کې پرېکړه وشوه، چې په ولایتونو کې د انتنونو د سروې او تثبیت لپاره یو منظم او مهالوېش لرونکی پلان ترتیب شي او د هغه د تطبیق بهیر په منسجم او شفاف ډول پرمخ یوړل شي.
