د کرنې وزارت پلاوي په مزار شریف کې د مفید ګروپ له فابریکو څخه لیدنه وکړه

۲۰ وږی ۱۴۰۴ هـ.ش
۱۸ رَبِیعُ الْأَوَّل ۱۴۴۷ هـ.ق
د کرنې، اوبولګولو او مالدارۍ وزارت د مالدارۍ او د حیواني روغتیا لوی رییس مفتي ذاکرالله ذاکر په مشرۍ یو پلاوی، د وزارت د مقام د سلاکارانو میرویس خوگیانی او محمد ولي وزیري په ملتیا، په مزار شریف ښار کې د مفید ګروپ له فابریکو څخه لیدنه وکړه. 
مفید ګروپ د هېواد له مخکښو کمپنیو څخه شمېرل کېږي، چې د خوراکي توکو د تولید، د خوراکي غوړ د پروسس، د پنبې او شولو د پروسس، همدارنګه د چرګ او کبانو د دانې د تولید په برخه کې فعالیت لري.
مفتي ذاکرالله ذاکر د یادو فابریکو د لیدنې پر مهال ډاډ ورکړ چې د کرنې وزارت چمتو دی، ترڅو د یاد شرکت د تولیدي فعالیتونو د پراختیا لپاره مالي، تخنیکي او د ځمکې برابرولو په برخه کې همکارۍ وکړي.
د مفید ګروپ چارواکو هم په دې لیدنه کې د لا زیاتو ځمکو غوښتنه وکړه، څو وکولای شي د یوې ورځنۍ چرګوړو د تولید او د چرګانوروزنې په سکتور کې پراخې پانګونې ته زمینه برابره کړي.