د کرنې وزارت مرکزي لابراټوار د کرونا ناروغانو تشخیص ته ځانکړی شو

۱۱ وری ۱۳۹۹
د کرنې، اوبولګولو او مالدارۍ وزارت ددې وزارت اړوند د حیواني ناروغیو د تشخیص او څېړنې مرکزي لابراټوار «CVDRL»، د کورونا «کویډ-۱۹» ویروس د مشکوکو پېښو د تشخیص په پار د عامې روغتیا وزارت په واک کې ورکړ.
د کرنې، اوبولګولو او مالدارۍ وزیر نصیر احمد درانی، د عامې روغتیا وزیر فیروز الدین فیروز سره دکرونا ویروس د ټسټ په پار ددې لابراټوار د ځانګړي کولو په پار د یوې هوکړې په لاسلیک کولو سره وویل، چې د حیواني ناروغیو د تشخیص او څېړنې مرکز د ناروغیو تر ټولو ستر او مجهز مرکز دی. ښاغلی درانی وویل، چې کرونا ویروس سره مبارزه د ټولو ګډ مسوولیت دی، هغه زیاته کړه: «د کرنې وزارت غواړي، چې د کرونا ویروس سره د مبارزې په پار د عامې روغتیا له وزارت سره عملاً په ګډه کار وکړي. د عامې روغتیا له وزیر سره مو د پنج شنبې په ورځ هوکړه وکړه، چې د وټرنری لابراټوار چې په افغانستان کې یو له معیاري او مجهزو لابراټوارونو دی او مدرن اوعصري تجهیزات او ماشینونه لري د کرونا ویروس د ټسټ په پار د عامې روغتیا وزارت په واک کې ورکړو.»
د کرنې او مالدارۍ وزیر دغه راز زیاته کړه، چې په دې لابراټوار کې ۱۸ تنه متخصصین فعالیت لري، چې دا متخصصان به هم د کرونا ویروس د مشکوکو پېښو د تشخیص په پار د عامې روغتیا له وزارت سره همکاري کوي.
نصیر احمد درانی دغه راز وویل، چې د حیواني ناروغیو د تشخیص او څېړنې په لابراټوار کې د پوهنتون زده کړیالانو ته هم روزنه ورکول کیږي. هغه همداراز وویل، چې د کرنې وزارت تر دې مخکې هم د عامې روغتیا له وزارت سره له نږدې همکارۍ درلود. ښاغلی درانی وویل: «هیله لرم، چې په دې همکاریو سره یوازې د کرنې وزارت په لابراټوارونو کې د کرونا ویروس د ټسټ وړتیا  سلګونو ته ورسیږي. موږ په ولایتونو کې هم یوشمېرتوکي او تجهیزات لرو چې د عامې روغتیا وزارت په واک کې یې ورکوو. په مزار کې یو لابراټوار لرو، چې د عامې روغتیا وزارت په واک کې یې ورکوو. له دې وروسته موږ د کرونا ویروس سره د مبارزې په برخه کې د یو تلپاتې پارټنر په توګه د عامې روغتیا وزارت سره همکار یو.»
په همدې حال کې، د عامې روغتیا وزیر داکټر فیروز الدین فیروز د کرونا ویروس د تشخیص په پار د کرنې وزارت له همکاریو مننه او قدرداني وکړ او وویل، چې له یوې اوونۍ وروسته به په دې لابراټوار کې هره ورځ له ۳۰۰ تر ۴۰۰ د کرونا مشکوکې پېښې تسټ او تشخیص شي. ښاغلي فیروز د کرونا ویروس د ټسټ او تشخیص مرکزونو زیاتوالی د کرونا ویروس د کنټرول په موخه مهم وباله او د کرنې وزارت لابراټوار ته په اشارې سره وویل: «دا هغه لابراټوار دی، چې زموږ د لابراټوار په څېر وړتیا او کیفیت لري او هغه لابراټوار دی، چې د نړیوال روغتیایي ادارې له خوا تایید شوی دی. ددې لابراټوار وړتیا له نورو ځایونو څخه ډېر ښه دي. شاید په دې لابراټوار کې د ورځې له ۳۰۰ تر ۴۰۰ سمپلونه تشخیص شي.»
تر هغه وروسته چې د هېواد په یوشمېر ولایتونو کې د کویډ ۱۹ یا کرونا ناروغۍ مثبتې پېښې زیاتې شوې یوشمېر ښوونځي او یوشمېر دفترونه چې د عامې روغتیا وزارت اړوند نه و هم کرونا سره د مبارزې د برخې په واک کې ورکړل شوي دي.