د کرنې وزارت مالي او اداري مرستیال د کندهار له والي سره وکتل
دکرنې، اوبولګولو او مالدارۍ وزارت مالي او اداري مرستیال ملا اغاجان اخند«حاجي سالم» کندهار ولایت ته د خپل سفر په ترڅ کې ددې ولایت له والي حاجي ملاصاحب سره په داسې حال کې وکتل، چې د کندهار امنیه قومندان مولوي سمیعالله «حزبالله»، د استخباراتو رییس مولوي شېراحمد تواب، د کندهار ښاروال الحاج ملاحکمتالله آخند، مستوفي مولوي نوراحمد سعید، د کرنې، اوبو لګولو او مالدارۍ رییس مولوي فضلالباري فضلي، د کرنې وزارت د ستراتیژیکو زېرمو رییس قدرتالله حقیار، د ولایت مقام د دفتر رییس ملاعبدالخالق هارون او یوشمېر نورو چارواکو هم شتون درلود.
د غونډې په پیل کې دکرنې وزارت مالي او اداري مرستیال کندهار ولایت ته خپل سفر موخه د کرنې او مالدارۍ سکټور د پیاوړتیا په پار له سیمه ییزو چارواکو، بزګرانو او مالدارانو سره کتل او د دوی ستونزې او ننګونې په ګوته کول وبلل هغه زیاته کړه: «د عايداتي سرچينو پياوړتيا او زياتوالى، له کروندګرو، مالدارانو او بڼوالو سره په مستقيم ډول ليدنه او د هغوى د ستونزو حل او د کروندګرو د اضافي غنمو پېرودل دې ولايت ته زموږ د سفر اصلي موخې دي او دا د اميرالمؤمنین حفظه الله فرمان دى.»
دغه راز دکرنې وزارت د اسټراټیژیکو زېرمو رییس مولوی قدرت الله حقیار وویل، «د کندهار په ولایت کې پنځه زره او لس متریک ټنو څخه د زیاتو غنم په ګډون په ۱۱ ولایتونو کې اضافي غنم موجود دي، دغه غنم له تدارکاتي پروسې وروسته له بزګرانو څخه په مستقیمه توګه پېرل کېږي، ددې چارې د پلي کولو په پار دوه کمېټې ګمارل شوې، چې د بیې ټاکنې او معاینې وروسته غنم پېرل کېږي. په کندهار کې څه بانډې پنځه زره مټریک ټنه اضافي غنم شتون لري، چې تر پېرلو وروسته ۲۷.۴ مټریک ټنه یې په کندهار کې زېرمه کېږي او ۲۳.۶ مټریک ټنه یې مرکزي سلو ته انتقالېږي.»
په همدې حال کې د کندهار والي د کرنې وزارت له مالي او اداري مرستیال څخه مننه وکړه، چې د یوې مهمې موخې لپاره کندهار ولایت ته سفر کړی. هغه دکرنې وزارت پلاوي ته په دې پرخه کې د هړاړخیزو همکاریو ډاډ ورکړ.
د کروندګرو د اضافي غنمو د پېرلو ترڅنګ، له غصب څخه د راګرځولو شویو او امارتي ځمکو په اجاره ورکول، د عشر او زکات په راټولولو کې همغږي، د مخابراتي انتنونو تثبیت او له کروندګرو سره لیدنه دې ولایت ته دکرنې وزارت د مالي او اداري مرستیال د سفر نورې موخې دي.
