د کرنې وزارت مالي او اداري مرستیال د فارم جدید ملي کلکسیونونو څخه لیدنه وکړه
۲۳ تله ۱۴۰۱ه.ش
۱۹ ربیعالاول ۱۴۴۴ ه.ق
د کرنې، اوبولګولو او مالدارۍ وزارت د مالي او اداري مرستیال معین مولوی فضل الباري فضلي پداسې حال کې، چې د ننګرهار د کرنې، اوبولګولو او مالدارۍ رییس مولوی عبدالستار محمد او د کانال رییس مولوی غلام الرحمن کظیم یې ملتیا کوله د بهسودو ولسوالی اړوند د فارم جدید د کلکسیونونو څخه لیدنه وکړه.
د لیدنې پر مهال د ننګرهار د کرنې اداری رییس مولوی عبدالستار محمد د کلکسیونونو په اړه د کرنې، اوبولګولو او مالدارۍ وزارت مالي او اداري مرستیال ته هر اړخیز معلومات ورکړه او زیاته یي کړه چې په دغه کلکسیونونو کې د ستروسو ۷۵ ډوله، د انارو ۷۹ ډوله، د خرما ۱۴ډوله، د زیتون ۱۰ ډوله، د املوکو ۲۵ ډوله، د انځرو ۱۶ ډوله او د لوکاټو ۱۲ ډوله موجود دي، چې د مېوو د حاصل ټولو په هر موسم کې په لسګونه محصلینو ته په یاد فارم کې عملي زده کړي هم ورکول کېږي.
ورته مهال د ننګرهار د کرنې ادارې رییس مولوی عبدالستار محمد د ځنګلونو د قطع د مخنیوی په موخه اچین ولسوالی ته سفر وکړ او د ځنګلونو د قطع د مخنیوي او د ځنګلونو د اهمیت په اړه د ځايي قومي مشرانو سره یي ناسته ترسره کړه.
محمد قومي مشرانو ته د کرنې وزارت هغه سپارښتنې او هدایات چې د ریاست الوزاراء محترم مقام لخوا ورکول شوي وه واورول، او زیاته يي کړه، چې ځنګلونه ملي شتمني دي او د دغه ملي شتمني ساتنه باید په ګډه سره وکړو او هیچاته اجازه ورنکړو چې زموږ ملي شتمني له منځه یوسي.
