د کرنې وزارت د پستې راټولول رسماً اعلان کړ

۴ زمری ۱۴۰۱ ه‍.ش
۲۷ ذوالحجَّة ۱۴۴۳ ه‍.ق
دکرنې، اوبولګولو او مالدارۍ وزارت سرپرست وزير مولوی عبدالرحمن راشد د اعزام شوی پلاوی د نظر مطابق د يوه مکتوب په ترڅ کې، د بادغيس او هرات په ولايتونو کې د پستې مېوې راټولولو او شولو ماتول سره موافقه وکړه او رسماًيې راټولول اعلان کړ.
دا په داسې حال کې ده، چې د هرات او بادغيس ولايتونو دکرنې رياستونو چارواکي د پستې ځنګلونو ته د تخنيکي ټيم تر استولو وروسته وويل، چې د دوی په ولايتونو کې تر ۸۰ سلنه پستې پوخوالي ته رسېدلي دي، چې راټولول يې بايد پيل شي.
 طبيعي ځنګلونه له ملي پانګو څخه شمېرل کېږي او د هېواد عايداتي سرچينې دي. سيمه ييزې ټولنې مکلف دي، چې دکرنې وزارت د اعلان سره سم تر بشپړ پخېدو وروسته يې حاصلات راټول کړي.
په وروستيو کلونو کې تر دې مخکې چې د پستې حاصلات په بشپړ ډول پاخه شي د ټولولو لړۍ يې پيل کېده، چې په دې سره يې ډېری حاصلات ضايع کېدل او عايد يې کمېدل، خو سږکال د افغانستان اسلامي امارت دکرنې وزارت د رهبرۍ د پاملرنې او د سيمه ييزو چارواکو د هلوځلو په پايله کې د پستې حاصلات په بشپړ ډول پوخوالي ته تر رسېدلو وروسته يې راټولول پيلېږي او دا د اسلامي امارت لويه لاسته راوړنه بلل کېږي، چې د کورنيو عوايدو په لوړوالي کې رغنده رول لري.

سندونه