د کرنې وزارت د دکرنیزو څېړنو انسټیټوټ لوی رییس د هلال ګروپ له چارواکو سره وکتل
۶ چنګاښ ۱۴۰۳ه.ش
۱۹ ذیالحِجّة ۱۴۴۵ه.ق
د هلال ګروپ د ختیځ زون د سیمه ییز دفتر مشر ډاکټر عبدالغفار لودین چې، د کرنیزو چارو متخصص انجینر عبدالولي کوچي او اړونده مسولینو یې ملتیا کوله د کرنې، اوبو لګولو او مالدارۍ وزارت دکرنیزو څېړنو انسټیټوټ لوي رییس مولوي نصرت الله طلحه او د ننګرهار کرنې، اوبو لګولو او مالدارۍ رییس مولوي محمد ولي محسن سره د هلال ګروپ د فعالیتونو د شریکولو او په اړونده برخه کې د چارو پر لا ښه والي خبرې وکړې.
د هلال ګروپ د کرنیزو چارو متخصص انجینر عبدالولي کوچي او د ختیځ زون سیمه ییز دفتر مسول ډاکټر عبدالغفار لودین په خپلو خبرو کې په ننګرهار کې د غنمو د اصلاح شوي تخم سربېره د سبو د تخمونو د تولید پر تړاو معلومات وړاندې کړل.
ښاغلي لودین زیاته کړه، په دې برخه کې ورسره د هېواد په کچه لسګونه تنه متخصصین او سلګونه تنه نور په دنده بوخت دي، چې د هېواد په کرنیز، اقتصادي پیاوړتیا او غذايي مصونیت کې یې ښه رول لوبولی دی.
په همدې حال کې د کرنې، اوبو لګولو او مالدارۍ وزارت د کرنیزو څېړنو انسټیټوټ لوی رییس مولوي نصرت الله طلحه د هلال ګروپ په ترسره کړیو فعالیتونو خوښي څرګنده کړه او دا چاره یې د هېواد په کچه بې سارې وبلله؛ نوموړي د هلال ګروپ مسؤلینو ته د ښې همغږۍ، د لوړحاصل ورکونکو نباتاتو داصلاح شوي تخمونو تولید په برخه کې د څېړنیزو مرکزونو سره اړیکي پالل او ګڼو نورو برخو کې لازمې سپارښتنې هم وکړې.
ښاغلي طلحه د چارو د لا ښه والي او ستونزو په حل کې د هر راز همکارۍ ډاډ څرګند کړ.