د کرنې وزارت او یوشمېر امارتي ادارو ترمنځ د ځمکې د لېږد تړونونه لاسلیک شول
۱۳ زمری ۱۴۰۳ه.ش
۲۸ مُحَرَّمُ الحَرام ۱۴۴۶ه.ق
د کرنې، اوبولګولو او مالدارۍ وزارت د ځمکو چارو لوی ریاست چارواکي وایي، چې د عالیقدر امیرالمؤمنین حفظه الله د فرمان له مخې د کرنې وزارت د ځمکو چارو لوی ریاست او د ترانسپورټ او هوایي چلند وزارت، د صنعت او سوداګرۍ وزارت او دغه راز د اسټنډرډ ملي ادارې «انسا» ترمنځ د ځمکې د لېږد تړونونه لاسلیک شول.
د چارواکو په خبره د کابل ولايت ده سبز ولسوالۍ کې (۱۵.۱۱) جريبه او نميروز ولايت کې (۲۲۱۴) جريبه امارتي ځمکه باندې د تيرپارکونو، الکترونيکي دروازو، مسافر وړونکي او بار وړونکي موټرو د ترمينلونو د جوړولو په موخه د اراضۍ لوی ریاست او د ترانسپورت او هوايي چلند وزارت تر منځ د ۲۲۲۹.۱۱ جريبه امارتي ځمکې د لېږد ټړون لاسلیک شو، چې له مخې یې یاده ځمکه د کرنې وزارت د اراضۍ لوی رياست لخوا ترانسپورت او هوايي چلند وزارت ته لېږدول کېږي.
بلخوا د کرنې وزارت د اراضۍ لوی ریاست او د صنعت او سوداګرۍ وزارت تر منځ په ۱۷ ولايتونو کې د ۲۶ صنعتي پارکونو د جوړولو په موخه د ځمکې د لېږد ټړون لاسلیک شوی، چې ددې تړون پر اساس په ۱۷ ولایتونو کې د ۲۶ صنعتي پارکونو جوړولو په پار ځمکه د صنعت او سوداګرۍ وزارت ته لېږدول کېږي.
دغه راز د یوې جلا ناستې په ترڅ کې د ۵ جريبه امارتي ځمکې د لېږد ټړون د کرنې وزارت د اراضۍ لوی رياست او د استندرد ملي ادارې «انسا» ترمنځ لاسلیک شو.
د یادې ځمکې د لېږد ټړون د ننګرهار ولايت مهمند درې ولسوالی کې په ۵ جريبه ځمکه باندې د استندرد ملي ادارې او د خوړو ملي ادارې لپاره د لابراتوار او کمپلکس د جوړولو په موخه ترسره شوې ده.
دغه تړونونه د اراضي لوی رییس مولوي محمود مظلوم، د ځمکو د انتقال او وېش رییس مولوي سید محمد سعید او د ترانسپورت او هوايي چلند د پروژو د پلانګذارۍ د تحقیق او تطبيق رییس داکتر رستم حفيظیار، د صنعت او سوداګرۍ وزارت د صتعتي پارکونو عمومي رییس قاري عبدالمجید قیام او د دغه وزارت د ځمکو د وېش رییس قاري هارون ابوبکر او دغه راز د استندرد ملي ادارې «انسا» د مالي او اداري څانګې رییس محمد عبدالله السیف ترمنځ لاسلیک شوي دي.
