د کرنې وزارت او پروفېشنل ترک مخابراتي شرکت ترمنځ تړون لاسلیک شو 

۲۴ وږی ۱۴۰۴ هـ.ش
۲۲ رَبِیعُ الْأَوَّل ۱۴۴۷ هـ.ق 
د کرنې، اوبو لګولو او مالدارۍ وزارت د ځمکو اجارې عمومي رياست او د پروفېشنل ترک مخابراتي شرکت مسؤلینو ترمنځ د مخابراتي انتنونو ماستر اګريمنټ تړون لاسليک شو.
په دې اړه جوړه شوې غونډه کې، چې د کرنې وزارت  د ځمکو اجارې په عمومي رياست کې جوړه شوې وه د ځمکو د اجارې عمومي رياست کفيل قاري حسام الدين اسرار، د ځمکو اجارې رياست کفيل محمد ولي استانکزی، د ځمکو د اجارې رياست د راډيويي مخابراتي انتنونو عمومي مدير انجنير نقيب الله توانا او د پروفېشنل ترک مخابراتي شرکت استازی فیروز الدین پاينده ګډون درلود.
په پیل کې د ځمکو اجارې عمومي رياست کفيل له نوموړي شرکت سره د دغه قرارداد د مخابراتي سایټونو د فعاليت او له دغې لارې هېواد والو ته په مخابراتي برخه کې د اسانتياوو د راوستلو په اړه او همدارنګه د دغه قرارداد د کلني عواید په پار خبرې وکړې.
ښاغلي وویل، چې له دې مخکې له ۷ مخابراتي او خدماتي لکه د ( اټوما، روشن، اتصالات، افغان بيسيم، اې.سي.جي، امين حامد جهان تصوير ) شرکتونو سره په کلنۍ ډول د ۲۴۴ ميليونه افغانيو په ارزښت تړونونه لاسليک شوي، چې دغه ټولې پيسې د کرنې، اوبو لګولو او مالدارۍ وزارت په عوایدو کې جمع کېږي.
په پای کې د نوموړي شرکت مسوول په مخابراتي برخو کې د ښو خدماتو د وړاندې کولو په موخه د هر راز همکارۍ ژمنه وکړه.