د کرنې سکټور د پراختیا پهپار د کرنې وزارت او همکارو مؤسسو ترمنځ د همغږۍ غونډه ترسره شوه
۲۳ کب ۱۴۰۴ه.ش
۲۵ رَمَضانُ المُبارَک ۱۴۴۷ه.ق
د کرنې، اوبو لګولو او مالدارۍ وزارت د پالیسۍ او پلان ریاست او د همکارو مؤسسو د استازو ترمنځ د همغږۍ او تخنیکي غونډه، د دې وزارت د پالیسۍ او پلان رییس سید احمد خالد صاحبزاده په مشرۍ د پلان عمومي ریاست د غونډو په تالار کې ترسره شوه.
په دې غونډه کې د افغانستان د بڼوالۍ مؤسسې رییس، د افغاناېډ مؤسسې تخنیکي مسئول او همدارنګه د کرنې وزارت یو شمېر سلاکارانو او متخصصینو ګډون کړی و. د دغې غونډې د جوړېدو موخه د هېواد په یو شمېر ولایتونو کې د کرنې سکټور د پراختیا په موخه د پروګرامونو ارزونه او د فعالیتونو همغږي وبلل شوه.
د غونډې په ترڅ کې د کرنې وزارت د پالیسۍ او پلان رییس د همکارو مؤسسو له هڅو او همکاریو څخه مننه وکړه او ټینګار یې وکړ چې د کرنې وزارت او یادو مؤسسو ترمنځ ګډې همکارۍ به د افغانستان د کرنې سکټور د پراختیا او پیاوړتیا په موخه دوام ومومي.
همدارنګه په دې غونډه کې د دایکنډي، سمنګان، تخار، فاریاب، پکتیکا او کونړ ولایتونو کې د کرنیزو پراختیايي پروګرامونو په اړه یو پرېزنټېشن وړاندې شو. په دغو ولایتونو کې افغاناېډ، د ماشومانو د ملاتړ مؤسسه، اکشناېډ، ټېلو او د افغانستان د بڼوالۍ مؤسسه د کرنې په بېلابېلو برخو کې فعالیتونه ترسره کوي.
یاد پرېزنټېشن چې د افغانستان د بڼوالۍ مؤسسې له لوري د یادو مؤسسو د فعالیتونو د دوام او همغږۍ لپاره چمتو شوی و، ګډونوالو ته وړاندې شو. په پای کې د کرنې وزارت کارپوهانو ټینګار وکړ چې وړاندې شوي معلومات او پروګرامونه باید د کرنې وزارت د لومړیتوبونو، پالیسۍ او ستراتیژیو له مخې ترتیب او تنظیم شي.
