د کرنې او مالدارۍ وزیر په مسکو کې د څارویو د روغتیا  په کنفرانس کې ګډون وکړ

۸ لیندۍ ۱۴۰۴ هـ.ش
۸ جُمَادَى الثاني ۱۴۴۷ هـ.ق
د اسلامي امارت د کرنې، اوبو لګولو او مالدارۍ وزیر مولوي عطاءالله عمري، او ورسره مل پلاوي په مسکو ښار کې د څارویو د روغتیا په کنفرانس کې ګډون وکړ.
مولوي عطاءالله عمري په خپله وینا کې وویل، چې افغانستان یو کرنیز او مالدار هېواد دی او د خلکو لویه برخه په دې سکتور کې فعالیت لري. نوموړي زیاته کړه، چې په دې وروستیو کلونو کې د حیواني ناروغیو خپرېدو پر حیواني تولیداتو، د خلکو پر ژوند او د هېواد پر اقتصاد منفي اغېزې کړې دي.
د افغانستان د کرنې، اوبو لګولو او مالدارۍ وزیر د سیمې له هېوادونو وغوښتل، چې په افغانستان کې د څارویو د روزنې او روغتیا په برخه کې پانګونه وکړي، او ډاډ یې ورکړ چې حکومت به د اړوندو ادارو له لارې پانګه‌والو ته لازمې اسانتیاوې برابرې کړي. سربېره پر دې، هغه ټینګار وکړ، چې د علمي او تخنیکي همکاریو پیاوړتیا کولای شي د حیواني ناروغیو په پېژندنه، مخنیوي او سم مدیریت کې اغېزمن رول ولوبوي.
د کنفرانس مسؤولینو هم د څارویو د روغتیا د ښه‌والي لپاره د ګډو پروګرامونو د جوړولو او د هېوادونو ترمنځ د مسلکي تجربو د تبادلې غوښتنه وکړه.