د کرنې، اوبولګولو او مالدارۍ وزارت د مقام د دفتر رییس معرفي شو
۳۱ غویی ۱۴۰۵ه.ش
۴ ذُو الحِجَّةِ ۱۴۴۷ه.ق
مفتي عبدالغفور بخاري د کرنې، اوبولګولو او مالدارۍ وزارت د رهبرۍ له لوري د یوې رسمي غونډې په ترڅ کې د یاد وزارت د مقام دفتر د رییس په توګه معرفي شو.
په دغو مراسمو کې، چې د کرنې او مالدارۍ مرستیال مولوي صدراعظم عثماني، د مالي او اداري چارو مرستیال مولوي نورالدین عمیر او د وزارت یو شمېر رییسانو او مسؤلینو ګډون کړی و، مفتي عبدالغفور بخاري په رسمي ډول د مقام دفتر ریاست کارکوونکو ته وروپېژندل شو.
مولوي صدراعظم عثماني د خپلو خبرو پر مهال وویل، هر حکومتي مسؤلیت یو امانت دی او کارکوونکي باید د موجوده شرایطو په پام کې نیولو سره خلکو ته د خدمت، او د بزګرانو او مالدارانو د ستونزو د کمولو لپاره صادقانه هڅې ترسره کړي.
نوموړي همداراز د مقام دفتر د پخواني رییس مولوي محمد حسین احمد خورشید د خدمتونو ستاینه وکړه او هغه ته یې د ځنګلونو د تنظیم رییس په توګه په نوې دنده کې د بریالیتوب هیله څرګنده کړه.
د یادونې وړ ده، چې مفتي عبدالغفور بخاري تر دې وړاندې د کرنې وزارت د اداري رییس او د تدارکاتو د رییس په توګه دندې ترسره کړې دي او په اداري او مدیریتي برخو کې کاري تجربه لري.
