د کابل په ولایت کې د برېښنايي قبالو د ورکړې چارې په رسمي توګه پیل شوې

۱۰ لړم ۱۴۰۴ هـ.ش

۱۰ جُمَادَى الأول ۱۴۴۷ هـ.ق
د کرنې، اوبولګولو او مالدارۍ وزارت د اراضۍ ریاست د قبالو د ثبت او صدور ریاست له‌خوا، د کابل ولایت د اراضۍ په ریاست کې د برېښنايي قبالو د ورکړې چارې په رسمي توګه پیل شوې.
دغه مراسم د اراضۍ لوی ریاست د مسؤلینو په حضور کې ترسره شوه، چې پکې د اراضۍ ادارې د استملاک او بیا مېشتېدنې عمومي رییس مولوي عبدالعلي عمري، د کابل ولایت د اراضۍ رییس مولوي عبدالباري شهاب، د قبالو د ثبت او صدور رییس مولوي حمیم صادقي، او د قبالو څانګې یو شمېر کارکوونکو ګډون درلود.
په پیل کې، د استملاک او بیا مېشتېدنې عمومي رییس مولوي عبدالعلي عمري د برېښنايي قبالو د توزیع د پیل په اړه خبرې وکړې او دا یې د هېوادوالو د ملکیتونو او استوګنځایونو د خوندیتوب په برخه کې د اراضۍ لوی ریاست له‌خوا یو مهم او ارزښتناک ګام وباله.
هغه زیاته کړه، چې د افغانستان اسلامي امارت له راتګ وروسته، د ځینو ستونزو له امله دا پروسه ځنډېدلې وه، خو اوس د اراضۍ د قبالو څانګې د مسؤلینو او کارکوونکو د هڅو په برکت، دا لړۍ بېرته پیل شوې او له دې وروسته به هېوادوالو ته قبالې په برېښنايي بڼه ووېشل شي.
په پای کې، یو شمېر هغو کسانو ته چې د قبالو چارې یې بشپړې شوې وې، برېښنايي قبالې هم په رسمي ډول وسپارل شوې.