د ځنګلونو بیارغونې او پراختیا په پار هڅې؛ خوست کې دوه زره هکټاره ځنګلونه روغول کېږي
۱۹ کب ۱۴۰۲ه.ش
۲۸ شَعبان المُعَظّم ۱۴۴۵ه.ق
د خوست دکرنې، اوبولګولو او مالدارۍ ریاست چارواکي وايي، چې د ملګرو ملتونو د خوړو او کرنې ادارې په همکارۍ ددې ولایت د صبریو، باک او ځاځي میدان په ولسوالیو کې نږدې دوه زره هکټاره ځنګلونه رغول کېږي.
د خوست دکرنې ریاست د چارواکو په خبره ددغو ځنګلونو د بیارغونې په پار د ملګرو ملتونو د خوړو او کرنې ادارې په همکارۍ ۲۷۶ زره ډول ډول نیالګي، چې په کې د چهارمغز، بادام او انارو نیالګي شامل دي چمتو شوي دي، چې د یادو ولسوالیو د ځنګلونو او څړځایونو د شوراګانو په واک کې ورکول کېږي.ددغو نیالګیو په کښېنولو سره به دوه زره هکټآره ځنګلونه ورغول شي او ترڅنګ یې خلکو ته د کار زمینه هم برابرېږي.
ددې پروژې د پلي کولو موخه ددې ولایت د تخریب شویو ځنګلونو بیارغونه، د طبیعي سرچینو پراختیا او بډاینه، سیمې ته ښکلا او زرغونتیا ورکول او په ټوله کې خلکو ته د کار زمینه باربرول دي.
