د پکتیکا په جانيخېل کې د کرنیزو ځمکو د ساتنې پهپار د ۱۰۰ متري ګبین دېوال د جوړولو چارې روانې دي
۱۶ وږی ۱۴۰۵ هـ.ش
۲۴ رَبِیعُ الْأَوَّل ۱۴۴۸ هـ.ق
د پکتیکا ولایت د جانيخېل ولسوالی اړوند د چامړي کلي کې د کرنیزو ځمکو د ساتنې، د اوبو د بهېدنې د کنټرول او د طبیعي زیانونو د مخنیوي په موخه د ۱۰۰ مترو په اوږدوالي د ګبین دېوال د جوړولو چارې روانې دي.
د پکتیکا د کرنې، اوبو لګولو او مالدارۍ ریاست مسوولینو د هیلټو مؤسسې له لوري د جوړېدونکي یاد ګبین دېوال له کاري بهیر څخه لیدنه کړې ده. د دې پروژې مالي ملاتړ د خوړو نړۍوال پروګرام «ډبلیوافپي» پر غاړه لري.
یاد ګبین دېوال ۱۰۰ متره اوږدوالی او ۳ متره لوړوالی لري، چې د بنسټ په برخه کې یې سور ۳ متره او په پورتنۍ برخه کې ۱ متر ټاکل شوی دی.
د پروژې په روانو کاري فعالیتونو کې اوس مهال ۱۲۵ تنه کاریګر په کار بوخت دي، چې هر یوه ته د ترسره شوو کاري فعالیتونو په بدل کې ۶۴۰۰ افغانۍ میاشتنی امتیاز ورکول کېږي.
د پروژې د تطبیق د روان بهیر له مخې، تر دې مهاله د ګبین دېوال د جوړولو چارې شاوخوا ۱۰ سلنه بشپړې شوې او پاتې چارې یې د ټاکل شوي پلان سره سم په منظم ډول دوام لري.
د پکتیکا د کرنې، اوبو لګولو او مالدارۍ ریاست چارواکي وایي، د دغه ډول بنسټیزو او حفاظتي پروژو پلي کول د کرنیزو ځمکو په ساتنه، د اوبو د بهېدنې په کنټرول او د سېلابونو او نورو طبیعي زیانونو په مخنیوي کې مهم رول لري. سربېره پر دې، د پروژې د تطبیق پر مهال د سیمې اوسېدونکو ته د کاري فرصتونو په برابرېدو سره د هغوی په اقتصادي ملاتړ کې هم مرسته کېږي.
د پکتیکا د کرنې ریاست د دې پروژې له تطبیق کوونکې هیلټو مؤسسې او مالي ملاتړ کوونکي د خوړو نړۍوال پروګرام «ډبلیوافپي» څخه مننه کوي او د ورته ګټورو او بنسټیزو پروژو د اغېزمن تطبیق په برخه کې د لا زیاتې همغږۍ او دوامدارې همکارۍ ډاډ ورکوي.
