د پکتیکا نکي ولسوالۍ کې مستحقو بزګرانو ته د مېوو او سبو وچوونکي ماشینونه ووېشل شول
۱۳ سلواغه ۱۴۰۳ه.ش
۳ شَعبان المُعَظّم ۱۴۴۶ه.ق
د پکتیکا ولایت نکي ولسوالۍ کې د کرنې ریاست په همغږۍ، د کلیو بیارغونې مؤسسې له لوري مستحقو بزګرانو ته د مېوو او سبو لمریز وچوونکي ماشینونه ووېشل شول. دغه مرسته د مسلکي کارکوونکو له ارزونې وروسته، د یوې ترسره شوې سروې پر بنسټ عملي شوې ده.
د کرنې ریاست مسئولین وايي، چې دا ماشینونه د کرنې سکتور پیاوړتیا او د بزګرانو اقتصادي اړتیاوو د پوره کولو لپاره وېشل شوي دي. دوی هیله څرګندوي، چې دا به د بزګرانو اقتصادي وضعیت ښه کولو کې مهم رول ولوبوي.
لمریز وچوونکي ماشینونه د کرنیزو محصولاتو د ضایع کېدو مخنیوی کوي او د بزګرانو لپاره د عاید سرچینې پراخوي، چې د کرنې سکتور کې د نوې ټکنالوژۍ د کارولو یوه مهمه برخه بلل کېږي.
