د پکتیا ډنډ پټان کې پر ۱۲۵ بېوزله کورنیو د هګیو چرګانو د وېش لړۍ پیل شو
۵ سلواغه ۱۳۹۸
د کرنې، اوبولګولو او مالدارۍ وزارت له خوا د بېوزله کورنیو د ملاتړ په لړ کې داځل د پکتیا ولایت په ډنډ پټان ولسوالۍ کې پر ۱۲۵ بېوزله کورنیو د ۱۲ زره او ۵۰۰ هګیو چرګانو د وېش لړۍ پیل شو.
د پکتیا د کرنې، اوبولګولو او مالدارۍ رییس انجنیر محمدالدین مومند وایي، چې پر دغو۱۲۵ بېوزله کورنیو ۱۲ زره او ۵۰۰ قطعې د هګیوچرګان، د چرګانو خوراکي توکي، واکسینونه، درمل او نور اړین توکي وېشل کیږي. ښاغلی مومند وویل، چې دبڼوالۍ او مالدارۍ ملي پروژې له خوا د پکتیا ولایت د ډنډه پټان ولسوالۍ ۱۲۵ بېوزله کورنیو هرې کورنۍ ته ۱۰۰ د هګیو چرګان، د چرګانو ۶۰۰ کیلو ګرامه خوراکي توکي، ۱۵ متره سیمې جال، چرګانو لپاره د خوراکي توکو لوښې، د چرګانو درې ځلې واکسین او لازمو در ملو ترڅنګ د چرګانو د ساتنې او پالنې په پار لازمې روزنې هم ورکول کیږي.
ددې پروژې پلي کولو څخه موخه په پکتیا ولایت کې د چرګانو روزنې صنعت ته پراختیا ورکول، په کور دننه مېرمنو ته د کار زمینه برابرول، د کورنیو د خوړو خوندیتوب او له دې لارې د بېوزله کورنیو اقتصادي پیاوړ تیا ده.
