د پکتیا شواک کې د دوه میلیونه افغانیو په ارزښت د سربند، محافظتي دېوال او کانال جوړولو چارې پیل شوې
۲۸ تله ۱۴۰۳ه.ش
۱۶ رَبِیعُ الْثاني ۱۴۴۶ه.ق
د پکتیا دکرنې، اوبولګولو او مالدارۍ ریاست چارواکي وایي، چې ددې ولایت د شواک ولسوالی د نوي کوټ کلي کې د سربند، محافظتي دېوال او کانال جوړونې پروژه په ۲ میلیونه افغانیو لګښت پیل شوه. د دې پروژې د بنسټ ډبرې کېښودلو په مراسمو کې د پکتیا د کرنې، اوبولګولو او مالدارۍ ریاست د عشر آمر مولوي زاهب الله ارسلا، د شواک ولسوالی ولسوال مولوي نورالله انس، د کرنې ریاست سلاکار او کارکوونکو، د پاملرنې مؤسسې استازو، قومي مشرانو او بزګرانو ګډون درلود.
د پکتیا د کرنې، اوبولګولو او مالدارۍ ریاست د عشر آمر مولوي ارسلا د پروژې د پیل پر مهال د نوي کوټ کلي اوسېدونکو ته د مبارکۍ ویلو ترڅنګ وویل، چې په دې سیمه کې به د کرنې ریاست د پاملرنې نړۍوالې مؤسسې په همکارۍ او د ملګرو ملتونو پرمختیایي پروګرام په مالي ملاتړ، ۱۵ متره سربند، ۲۳ متره محافظتي دېوال او ۲۳ متره اوږد کانال په ۲ میلیونه افغانیو جوړ شي. دغه پروژه به د یوې نیمې میاشتې په موده کې بشپړه شي او کرنیزې ځمکې به خړوبې کړي او د سیلابونو له زیان څخه به یې وساتي. هغه زیاته کړه چې د دې پروژې په ترڅ کې به ۵۰ تنه ځايي اوسېدونکو ته د ۴۵ کاري ورځو لپاره د کار فرصتونه برابر شي.
ځايي اوسېدونکو او کروندګرو دغه پروژه د خپلو کرنیزو ځمکو د خړوبولو لپاره ګټوره وبلله او د ورته پروژو پر تطبیق یې ټینګار وکړ، ترڅو د اوبو بندونو، محافظوي دېوالونو او نورو رغنیزو چارو په مرسته خپلې ځمکې خوندي او حاصلخېزې کړي.
