د پکتیا دکرنې ریاست: د ځمکو د غصب د مخنيوي کميټې غړو ورزشي کمپلیکس څخه لیدنه وکړه
۲۲ مرغومې ۱۴۰۱ه.ش
۱۹ جُمادیَ الثّاني ۱۴۴۴ ه.ق
د پکتیا دکرنې، اوبولګولو او مالدارۍ ریاست وایي، چې د ځمکو د غصب د مخنيوي کميټې غړو د پکتیا ولایت مرکز ګردیز اړوند ورزشي کمپلیکس څخه لیدنه وکړه.
د پکتیا ولایت د غصب د مخنيوي کميټې غړو د ورزشي کمپلیکس تصروف کوونکو څخه وغوښتل، چې په ياده سیمه کې د غصب شويو ځمکو د حدودو د تثبيت، د غصب کوونکو د معلومولو او د غصب شويو ځمکو د مخنيوي په برخه کې له ټاکل شوې کميټې سره همکاري وکړي.
د یادې کمیټې رییس زیاته کړه، چې د ځمکو د غصب د مخنيوي کميټې غړي به خپلې عملې کړنې د لومړنيو معلوماتو د ترلاسه کولو وروسته ډېر ژر پيل کړي او نور به هیچاته اجازه ورنه کړي، چې په خپل سري ډول هغه سلطاني ځمکې چې د حکومت د شک لاندې وی دوی غصب کړي او که چېرته د چا لخوا دا کار وشو ددې کمیسیون لخوا به رسمآ د قانون منګولو ته ورپېژندل شي.
د يادولو وړ ده چې د پکتیا ولایت د غصب شويو ځمکو د مخنيوي کميټې غړو له لورې د دې ولایت ورزشي کمپلیکس GPS نقطي واخیستل شوې ترڅو معلومه کړي، چې څومره ځمکه د خلکو لخوا تصرف شوې.
همدارنګه د ځمکو د غصب د مخنيوي کميټې پلاوې لخوا به په راتلونکي کې د یادې سیمې تصرف کوونکو ته استعلامونه هم ورکړل شي ترڅو استعلامونه ځواب کړي او تر دریو ورځو پورې قضاء ا م ا ر ت ته وسپاري.
