د هندوستان ۵۴زره او ۱۵۰ ټنه مرسته شوي غنم د هېواد په سیلوګانو کې زېرمه شوه

۲۸ لړم ۱۳۹۹
د کرنې، اوبولګولو اومالدارۍ وزارت چارواکي وایي، چې د هندوستان ۵۴زره او ۱۵۰ مټریک ټنه مرسته شوي غنم د هېواد په سیلوګانو کې زېرمه شوي دي.
د کرنې وزارت د خوړو خوندیتوب او د غله جاتو د اسټراټژیکو زېرمو رییس محمدعمر عمر وایي، چې د هندوستان هېواد ۵۴زره او ۱۵۰.۱۸مټریک ټنه مرسته شوي غنم انتقال او په مرکزي سیلو او ولایتونو کې زېرمه شوي دي.
تېرکال هندوستان له افغانستان سره ۷۵ زره مټریک ټنه د غنمو د مرستې ژمنه کړې وه، چې د لېږد لړۍ یې روانه ده. تر دې دمه، ددغو غنمو څه باندې ۵۴ زره مټریک ټنه د کابل، بلخ، بغلان، هرات او کندهار په سیلوګانو کې زېرمه شوي دي.
دا په داسې حال کې ده، چې په ۲۱ ولایتونو کې دهېوا اسټراټیژیکې زېرمې، چې سیلو او اسټراټیژیک ګدامونه په کې شامل دي د ۲۵۶ زره مټریک ټنه غنمو د ساتې او زېرمه کولو وړتیا لري.