د هملند دکرنې رییس د صنعت او سودګرۍ وزارت له پلاوي سره وکتل
د هلمند ولایت د کرنې، اوبولګولو او مالدارۍ رییس مولوي نیازمحمد وهاج د صنعت او سوداګرۍ وزارت له راغلي لوړ پوړي پلاوي سره د خپل کار په دفتر کې وکتل.
یاد پلاوي په پیل کې هلمند ته د خپل سفر موخه د کرنې له رییس سره شریکه کړه، هغوی وویل چې غواړي د عالیقدر امیرالمؤمنین حفظه الله د حکم پر اساس د کندهار هلمند پر دوه لارې د صنعتي پارک اړوند ٢٠٠٠ جریبه ځمکې د لېږد په پار د یادې ځمکې اوسني حالت وارزوي ترڅو د یاد صنعتي ښارګوټي پاتې کارونه چټک او هرڅه ژر یې عملي چارې پیل شي.
د هلمند دکرنې رییس یاد پلاوي ته د یاد پلان د تطبیق په برخه کې د بشپړې همکارۍ ډاډ ورکړ او ژمنه یې وکړه، چې د مشرتابه حفظه الله د حکم مطابق به په ټول وس او توان سره هڅه کوي ترڅو دغه عام المنفعه پلان په دې ولایت کې په ښه ډول تطبیق شي.
د یادولو وړ ده، چې د هلمند ولایت صنعتي پارک چې پلان یې له وړاندې ترتیب او منظور شوی دی، د ځمکې د انتقال چارې یې په مرکز کې د بشپړېدو په حال کې دی، یاد پلان په شاخوا ٢٠٠٠ جریبه امارتي ځمکه کې د سلګونو تولیدي فابریکو د رغولو په موخه د لښکرګاه - کندهار پر دوه لارې ډیزاین او ترتیب شوی دی، چې مسؤلین هڅه کوي دغه پلان ډېر پلي شي.
