د هلمند ګرشک ولسوالی کې لسګونه تر وخت تېر او بریډر چرګان له منځه یوړل شول
۲۲ کب ۱۴۰۱ه.ش
۲۰ شَعبان المُعَظّم ۱۴۴۴ ه.ق
د هلمند ولایت د کرنې، اوبولګولو او مالدارۍ ریاست لخوا هلمند کې د ممنوعه چرګانو د پلور مخنیوئ په دوام ګرشک ولسوالی کې لسګونه چرګان تر تشخیص او تثبیت وروسته له منځه یوړل شول
په یاده ولسوالی کې د ګډ پلاوي لخوا چې په ترکیب کې یې د ولسوالی، امنیې قوماندانۍ، کرنې ریاست او ښاروالۍ استازي شامل دي له بېلابېلو سیمو څخه تر لیدنو او ارزونو وروسته تر وخت تېر او بریډر چرګان را ټول شول.
یاد چرګان چې په فني او مسلکي لحاظ یې غوښې د انسانانو روغتیا ته زیان رسوي او له ګاونډيو هېوادونو څخه هلمند ته په قاچاقي ډول واردېږي ونیول شول او له حلالولو وروسته تر خاورو لاندې شول .
د هلمند دکرنې ریاست چارواکي وایي، چې دغه پروسه به د مرکز لښکرګاه په ګډون په ټولو ولسوالیو کې په دوامداره ډول روانه وي تر څو د غیر قانوني وارداتو راتلونکو احتمالي صحي خطرونو مخه ونیول شي.
