د هلمند پوهنتون او د کرنې ریاست ترمنځ د ګډو علمي او تخنیکي همکاریو تړون لاسلیک شو

۴ غبرګولی ۱۴۰۵ه‍.ش
۸ ذُو الحِجَّةِ ۱۴۴۷ه‍.ق
د هلمند ولایت د کرنې، اوبو لګولو او مالدارۍ ریاست او د هلمند پوهنتون ترمنځ د ګډو علمي، تخنیکي او مسلکي همکاریو د پراختیا په موخه د تفاهم او همکاریو  هوکړه لیک لاسلیک شو.
په همدې مناسبت جوړه شوې غونډه کې د هلمند پوهنتون مشرتابه، استادانو، د کرنې رییس مولوي شیر احمد رفیع، د یاد ریاست مسؤلینو او یو شمېر کارکوونکو ګډون کړی وو.
د غونډې په پیل کې د هلمند پوهنتون رییس د دواړو ادارو ترمنځ د همغږۍ او ګډ کار ارزښت ته اشاره وکړه او ویې ویل، چې د علمي بنسټونو او امارتي ادارو ترمنځ همکاري د هېواد د پرمختګ او د ټولنې د اړتیاوو د پوره کولو لپاره مهم رول لري.
د هلمند پوهنتون رییس دغه راز زیاته کړه، چې پوهنتونونه یوازې د زده کړو مرکزونه نه، بلکې د ټولنې د ستونزو د حل لپاره مهم علمي او څېړنیز بنسټونه دي، او د پوهنتون استادان به هڅه وکړي، څو خپل علمي ظرفیتونه د عملي خدمتونو لپاره وکاروي.
ورپسې د هلمند د کرنې، اوبو لګولو او مالدارۍ رییس مولوي شیر احمد رفیع د خپلو خبرو پر مهال وویل، چې اسلامي نظام د افغان ولس د قربانیو ستره لاسته راوړنه ده او د همدې نظام د لا پیاوړتیا لپاره ګډې هڅې، علمي همغږي او عملي خدمتونه اړین دي.
نوموړي زیاته کړه، چې د کرنې سکتور د پرمختګ لپاره د پوهنتونونو له علمي ظرفیت څخه ګټه اخیستل مهم دي او د پوهنتون له استادانو او متخصصینو یې وغوښتل، ترڅو خپلې تجربې او څېړنې د کرنې له ریاست سره شریکې کړي.
د لاسلیک شوي هوکړه لیک له مخې به دواړه لوري د علمي څېړنو، مسلکي روزنو، کرنیزو پروژو، ظرفیت لوړونې، تخنیکي پروګرامونو، علمي سیمینارونو او نورو ګډو فعالیتونو په برخو کې همکاري او همغږي پراخه کړي.