د هلمند ولایت په بولان څېړنیز فارم کې پر بېلابېلو مېوو او نباتاتو څېړنې روانې دي
د هلمند ولایت کرنې، اوبولګولو او مالدارۍ ریاست د کرنیزو چارو آمریت اړوند د کرنیزو څېړنو مدیریت مسلکي کارکوونکي د بولان څېړنیز فارم په ۲۶ جریبه ځمکه کې په بېلابېلو څانګو کې څېړنې ترسره کوي.
په دغه فارم کې د مېوو بڼونو ترڅنګ د حبوباتو، سبو، تېلې بوټو، مورنيو او هستوي تخمونو او د کرنیزو تجربو په اړه څېړنې روانې دي. د بڼونو په برخه کې د مورنیو پایو ساتنه، د پیوند لپاره د پنګو او نیالګیو لپاره د قلمو وېش او زده کړیالانو او کروندګرو ته د پیوند، شاخبرۍ، تاکبرۍ، اوبولګولو، د سرو او لایم سلفر کارونه، د ځمکې نرمولو، او حاصل راټولولو عملي زده کړې وړاندې کېږي. همدارنګه، د وقایې لپاره د ژمنیو غوړیو د سپرې چارې د پلان له مخې ترسره کېږي.
د غلو، حبوباتو او سبو په برخه کې دا مهال د غنمو او وربشو ۱۲ سیته تجربې، د غنمو ۱۰ ډوله مورنۍ او هستوي تخمونو روزنه او د پیازو او ګشنیزو هستوي او مورنۍ تخمونو تولید څېړل کېږي. سربېره پر دې، د عدسو، نخودو، شړشم او زغرو د مطالعې تجربې هم روانې دي.
د هلمند د کرنې ریاست هڅه کوي، چې په هلمند ولایت کې د بېلابېلو نباتاتو، حبوباتو، سبو، او مېوو د تخمونو اصلاح، ترویج او تکثیر په برخه کې فعالیت وکړي. موخه دا ده، چې د کروندګرو حاصلات لوړ کړي او هغوی ته د قناعت وړ عاید ترلاسه کړي.
