د هلمند والي ددې ولایت دکرنې ریاست چارواکو سره و کتل
۲ وری ۱۴۰۳ه.ش
۱۱ رَمَضانُ المُبارَک ۱۴۴۵ه.ق
د هلمند ولایت والي الحاج مولوي عبدالرحمن مسلم کندوزی، د هلمند د امنیې قوماندانۍ قوماندان الحاج مولوي عبدالحکیم مبارک په شتون کې، د هلمند ولایت د کرنې، اوبولګولو او مالدارۍ رییس الحاج مولوي نیازمحمد وهاج او د دې ولایت د ولسوالیو د کرنې له مسؤلینو سره وکتل.
د یادې لیدنې پر مهال د هلمند د کرنې، اوبولګولو او مالدارۍ رییس هلمند والي سره د کرنې ریاست لخوا په دې وروستیو کې په بېلابېلو برخو کې د مهمو لاسته راوړنو او ترلاس لاندې پلانونو په اړه هر اړخیز معلومات شریک کړل.
د هلمند دکرنې رییس په دې ولایت کې د کرنې سکتور د ودې او پراختیا، د امارتي ځمکو د غصب د مخنیوي او د غصب شویو ځمکو د استرداد په برخه کې د خپلو ترسره شویو فعالیتو په اړه د هلمند والي او د غونډې ګډونوالو ته خپل راپور وړاندې کړ.
وروسته په وار سره د اړونده ولسوالیو د کرنې مسؤلینو لخوا په ولسوالیو کې د روانو چارو، د شته ستونزو او یو شمېر وړاندیزونو په اړه ولایت مقام سره خپل معلوماتونه شریک کړل.
په همدې حال کې د هلمند والي الحاج مولوي عبدالرحمن مسلم کندوزی د هلمند ولایت د کرنې ریاست د رهبرۍ او په ولسوالیو کې د کرنې مسؤلینو کړنې وستایلې، هغه د ولایتي ادارې لخوا دکرنې ریاست د چارو د بهبود او نوښت په برخه کې د بشپړې او دوامدارې همکارۍ ډاډ ورکړ.
همدارنګه د هلمند ولایت د امنیې قوماندانۍ قوماندان الحاج مولوي عبدالحکیم مبارک هم د هلمند کرنې ریاست سره په امنیتي برخه کې د ځمکو د غصب مخنیوی، له غاصبینو د ځمکو د استرداد او نورو اړینو چارو کې د پوره همغږۍ او همکارۍ ژمنه وکړه.
