د هلمند ناوې ولسوالۍ کې د لسګونه جریبه ځمکو د تخریب مخه نیول کیږي
![د هلمند ناوې ولسوالۍ کې د لسګونه جریبه ځمکو د تخریب مخه نیول کیږي](https://www.mail.gov.af/sites/default/files/2020-08/118006232_3539034236121151_4608893567839347850_o.jpg)
۲۹ زمری ۱۳۹۹
د هلمند دکرنې، اوبولګولو او مالدارۍ ریاست چارواکي وایي، چې ددې ولایت د ناوې ولسوالۍ د نګارین په سیمه کې د هلمند د سیند د اوبو د زیاتېدو پروخت د خلکو کرنیزې ځمکې تر اوبو لاندې کېدلې او هر کال به لسګونه جریبه کرنیزې ځمکې او کروندې له منځه تلل او تخریبېدل.
د هلمند دکرنې رییس زلمی الکو وویل، چې دغې ستونزې ته په کتو د هلمند دکرنې ریاست له خوا د ناوې ولسوالۍ د نګارین په سیمه کې د کرنیزو ځمکو د خوندي کولو په پار د یوې ګبیوني پروژې چارې پیل شوي دي، چې د بشپړېدو په درشل کې دي.
ښاغلی الکو وویل، چې دغه پروژه د کرنې وزارت له پراختیایي بودیجې څخه د هلمند ولایت د مقام په همکارۍ د کرنې ریاست له خوا پلي کیږي، چې د اوبو د زیانونه مخه ونیول شي او ترڅنګ یې د کروندګرو کروندې او ځمکې هم خوندي شي.
د زلمي الکو په خبره ددې ولسوالۍ د کرنې د ودې په موخه نورې پروژې هم پلي شوي دي، چې په پلي کولو سره یې ددې ولسوالۍ د بزګرانو ډېرې ستونزې هوارې شوي دي. هغه وویل، چې د نویو پروژو په پلي کېدو سره به ددې ولسوالۍ د بزګرانو یوشمېر نور شته ستونزې هم هوارې او د دوی اقتصاد به ور سره وده وکړي.