د هلمند مارجه کې بزګرانو ته د اصلاح شویو تخمونو او کیمیاوي سرو په اړه روزنه ورکول شوه
١۹ لیندۍ ۱۴۰۲ه.ش
۲۷جُمَادَى الأول ۱۴۴۵ ه.ق
دهلمند ولایت د کرنې، اوبولګولو او مالدارۍ ریاست اړوند، د مارجې ولسوالی د کرنیزو خدمتونو مدیریت له لوري د بشري خیریه مؤسسې په همکارئ سلګونه بزګرو ته روزنه ورکړل شوه.
دغو بزګرو ته چې له وړاندې ورته د کرنې ریاست له لوري اصلاح شوي تخمونه او کیمیاوي سرې وېشل شوي دي، د یادو تخمونو د کرنې، روزنې، د کیمیاوي سرې کارونې او د غنمو په کروندو کې د نباتي ناروغیو مخنیوی په برخه کې زده کړې ورکړل شوي دي.
دهلمند ولایت د کرنې ریاست هڅه کوي، چې بزګر د اصلاح شویو تخمونو پر ارزښت، په نوې بڼه د کرنې په لارو چارو او همدارنګه د ښو حاصلاتو د ترلاسه کولو په برخه کې د مسلکي کارکونکو په مټ وپوهوي چې دغه لړۍ به نورو ولسوالیو ته هم وغځول شي.
