د هلمند دکرنې رییس: چارې مو په صداقت او ایماندارۍ مخته یوسئ
۱۲ مرغومې ۱۴۰۲ه.ش
۲۰ جُمَادَى الثاني ۱۴۴۵ ه.ق
د هلمند ولایت د کرنې، اوبولګولو او مالدارۍ رییس الحاج مولوي نیاز محمد وهاج ددې ادارې له آمرینو او کارکوونکو سره د همغږۍ غونډه دائره کړه.
د غونډې په ترڅ کې د هلمند کرنې رییس الحاج مولوی نیاز محمد وهاج وویل، چې دنده امتیاز نه بلکه یو ستر مسوولیت دی: «ددې لپاره چې مشران او آمرین پر ما باو کړی دی، چې ددې جنګ ځپلې ولس ته چوپړتیاوې وړاندې کړم، نو په همدې موخه باید خپلې چارې په پوره ایماندارۍ تر سره کړو، ترڅو دغه ستر مسوولیت په سمه توګه ادا شي.»
ښاغلی وهاج وویل، چې د ادارې ټولو آمرینو، مدیرانو او مامورینو ترمنځ باید پوره همغږي شتون ولري هغه ددې ادارې کارکوونکو ته په خطاب کې وویل، چې په خپلو چارو کې صداقت او رښتنولی ته پام وکړي او د اصولو، قوانینو او مشرانو د اوامرو اطاعت دې وکړي.
هغه همدارنګه زیاته کړه : «موږ په خپله اداره کې د ټولو کدرونو په خپل ځای احترام کوو خو له دوی څخه د ښو او صادقانه خدماتو د وړاندې کولو غوښتنه کوو.»
د هلمند دکرنې رییس اړونده مسؤلینو ته سپارښتنه وکړه، چې ورځنی چارې او اجرائت به مو د اسلام مقدس دین او د اسلامي امارت د ټولو قوانینو، مقرراتو او لوایحو سره سمې مخې ته یوسئ.
د هلمند دکرنې رییس اړونده مسؤلینو ته همدارنګه سپارښتنه وکړه، چې خپلې نیکې سلاء مشورې ورسره شریکې کړي، د ادارې دروازه د ټولو کارکوونکو ترڅنګ د عامو ولسونو پر مخ همېشه خلاصه ده ترڅو مؤثر خدمات ولسونو ته وړاندې شي.
وروستیو کې د هلمند د کرنې ریاست آمرینو، مدیرانو او مامورینو په وار سره خپلې ستونزې، غوښتنې او وړاندیزونه کرنې رییس سره شریک کړل، چې د حل په برخه کې ورته د اصولي کړنو ډاډ ورکړل شو.
