د هلمند دکرنې ریاست: د ډاکار مؤسسې د کرنې برخې ولایتي مسؤل سره مشورتي ناسته وشوه
۲۹ زمری ۱۴۰۲ه.ش
۳ صَفَرُ المُظَفَّر ۱۴۴۵ه.ق
د هلمند ولایت د کرنې، اوبولګولو او مالدارۍ ریاست مقام په لارښؤنه، له افغان کډوالو سره د مرستې لپاره د ډنمارک کمیټې (ډاکار) مؤسسې اړوند د لغمان، جلال اباد او هلمند لپاره دکرنې، اوبو لګولو او مالداری د پروژی مسؤل ډاکتر عاشق الله عاطف سره د کرنې ریاست مسلکي کارکوونکو مشورتي ناسته ترسره شوه.
ددې ناستې موخه په هلمند ولایت کې د کوکنارو د بدیل کښت او د کروندګرو د عمده ستونزو د تشخیص په اړه د مشورو او معلوماتو شریکول وو.
دهلمند ولایت د کرنې ریاست اړوندو مسلکي کارکوونکو د نوموړې پروژې مسؤل سره د هلمندي ځمکوالو د کرنیز اقتصاد پیاوړتیا په برخه کې هر اړخیزه معلومات شریک کړل او ترڅنګ یې د کوکنارو د بدیل په اړه د نوو با ارزښته نباتاتو د ترویج او تکثیر په برخه کې سلا او مشورې ورکړې.
ښاغلي عاطف ژمنه وکړه، چې یادې مشورې او غوښتنې به تر مرکزي مسؤلینو رسوي او هڅه به وکړي، چې هلمند ولایت کې د کوکنارو لپاره پر بدیلو پروژو کار وشي.
د یادونې وړ ده، چې ډاکار د هلمند ولایت د کرنې ریاست سره په همغږۍ ګڼې پروژې پلي کړي دي او د ځینو پروژو چارې لا هم روانې دي.
