د نورستان کرنې ریاست کې راستانه شویو کډوالو ته د مرستو د وېش په موخه ناسته وشوه
۲۰ سلواغه ۱۴۰۴ه.ش
۲۱ شَعبان المُعَظّم ۱۴۴۷ه.ق
د نورستان ولایت د کرنې، اوبو لګولو او مالدارۍ ریاست کې راستانه شویو کډوالو ته د خوراکي غنمو او نغدي مرستو د وېش په پار د ځانګړې کمیټې ناسته وشوه. دغه ناسته د نورستان د کرنې رییس مولوي محمد ولی محسن په مشرۍ ترسره شوه.
یاده کمیټه د کرنې ریاست، صنعت او سوداګرۍ، مستوفیت، ولایت او د کډوالو چارو ریاستونو له استازو جوړه ده. په ناسته کې د مستحقو راستانه شویو کډوالو د سروې، انتخاب، او د مرستو د عادلانه وېش پر میکانېزم او طرزالعمل خبرې اترې وشوې.
د نورستان دکرنې رییس مولوي محمد ولي محسن ټینګار وکړ چې مرستې باید په بشپړ شفافیت، عدالت، د ټاکل شوي طرزالعمل او د اسلامي امارت د اصولو سره سم مستحقو کډوالو ته ووېشل شي.
باید وویل شي، چې په نږدې راتلوکې کې به دکرنې وزارت له خوا د نورستان ولایت په کچه پر سلګونو راستانه شویو ګډوالو غنم او نغدې پیسې ووېشل شي.
