د ننګرهار کانال کې د غنمو په حاصلاتو کې ۳۰ سلنه زیاتوالی راغلی
۱۸ زمری ۱۴۰۳ه.ش
۴ صَفَر المُظَفَّر ۱۴۴۶ه.ق
د ننګرهار کانال شرکت مسوولینو خبر ورکړی، چې په دغه کانال کې د تېر ۱۴۰۲ کال په پرتله سږکال د غنمو په حاصلاتو کې ۳۰ سلنه زياتوالی راغلی دی.
د مسوولینو په خبره، روان کال د غنمو فصلونه د ږلۍ او نورو طبيعي افتونو څخه خوندي پاتې شوي چې ورسره یې سږني حاصلات ښه دي.
د ننګرهار کانال شرکت رییس مولوی غلام رحمن کظیم وایي، چې سږکال د ننګرهار کانال په څلورګونو فارمونو کې د قراردادي شرکتونو او اجاره لرونکو له خوا پر ۷۵۰۰ جریبه ځمکه اصلاح شوي غنم کښت شوي ؤ، چې ترې ۱۳ زره ټنه دغنمو حاصلات رآټول شوي، چې د تېرکال په پرتله ۳۰ سلنه زیاتوالی ښيي.
ښاغلی کظیم دغه راز وویل، چې سږکال به د ختیځ زون د غنمو د تخمونو له اړخه پرځان بسیاشي.
بلخوا د ننګرهار د کرنې، اوبو لګولو او مالدارۍ رياست وایي، چې سږکال پلان لري چې د ننګرهار د مرکز په ګډون ددې ولایت په ټولو ولسواليو کې زرګونو کروندګرو ته د غنمو باکيفيته اصلاح شوي تخمونه او کيمياوي سرې وېشي.
