د ننګرهار کانال شرکت کې زده کړیالانو ته د عملي زده کړو زمینه برابره شوې

د ننګرهار کانال شرکت چارواکي وایي، چې ددې شرکت اړوند بېلابېلو فارمونو او بڼونو کې دکرنې برخې زده کړیالانو ته د عملي زده کړې زمینه برابره شوې ده. 
په همدې موخه د لغمان پوهنتون د بڼوالۍ ( هارټیکلچر ) د څانګې د امر استاد پوهنمل شاهدالله خاتم نیازی په مشرۍ د څلورم او درېيم ټولګیو ۴۹ تنو محصلینو تېره ورځ د ننګرهارکانال شرکت په هډې فارم کې  د ستروسو بڼوڼو، خرما بڼوڼو، زیتونو فابرېکې، شنو خونو، د اوبه خور د څاڅکو سیستم او نورو څخه د عملي زده کړې په موخه لېدنه ترسره کړه .  
د ننګرهار کانال د هډې فارم امر انجنیر سیداغا میاخیل راغلو محصلینو ته ښه راغلاست ووایه او ترڅنګ يې د ننګرهارکانال شرکت د  رییس مولوي غلام الرحمن کظيم پیغام چې په کې راغلي، کانال شرکت (ستره اقتصادي، کرنيزه او ټولنيزه پروژه ) ده، ځوان نسل په ځانګړي توګه لوستي ځوانان دې دا ستره پروژه لا ښه وپېژني او ورته دی کار وکړي، ځکه دا پروژه د ټولو ده  او سمبالوونکي او پرمختګ ورکوونکي يې نوى نسل او ځوان کهول دې .
په پای کې د لغمان پوهنتون د ریاست په استازۍ استاد پوهنمل شاهدالله خاتم نیازی د ننګرهارکانال شرکت د رهبرۍ، هډې فارم امریت، زیتونو فابرېکې امریت  او د ننګرهارکانال شرکت د مطبوعاتو لوی مدیریت نه مننه وکړه چې محصلینو ته مو عملي زده کړو او لېدنو په موخه اړونده ټولې پروژې له نږدې وښودل .