د ننګرهار کانال شرکت کې د چرګانو او هګیو د تولید ستره فابریکه پرانیستل شوه

د کرنې، اوبولګولو او مالدارۍ وزارت دکرنې او مالدارۍ مرستیال مولوی صدراعظم عثماني په داسې حال کې، چې د ننګرهار والي حاجي ملا محمدنعیم، د ننګرهار کانال شرکت رییس مولوی غلام الرحمن کظیم، د ننګرهار دکرنې رییس مولوی عبدالستار محمد او یوشمېر نورو سیمه ییزو چارواکو یې ملتیا کوله د ننګرهار کانال شرکت کې د چرګانو او هګیو د تولید د سترې فابریکې پرانیسته وکړه.
دغه فابریکه د «حبیب حسام پولټري کمپلکس» په نوم د ننګرهار کانال په ۱۱۶ جریبه ځمکه کې د نږدې دوه میلیونه ډالرو په لګښت جوړه شوې ده، چې د میاشتې ۶۰۰ زره غوښین او هګۍ ورکوونکي چرګان تولیدوي.
د کرنې وزارت دکرنې او مالدارۍ مرستیال مولوی صدر اعظم عثماني ددې فابریکې په پرانیست غونډه کې وویل: «د چرګانو د غوښې او هګیو له پلوه ځان بساینې ته نږدې شوي یو، په دې برخه کې مو هلې ځلې ګړندۍ کړي، ښه بېلګه يې د حبیب حسام پولټري کمپلیکس ننې پرانیسته ده ».
 ښاغلي عثماني دغه راز وویل، چې هېڅوک د مشروع پانګونې مخه نشي نېولې، ځکه صنعت او د هېواد په ټولګټو پروژو پانګونه د هېواد په وده او پرمختک کې اساسي ونډه لري.
دکرنې او مالدارۍ مرسیتال دغه راز وویل، چې اوس مهال په هېواد کې د چرګانو روزنې له لس زرو زیات فارمونه فعالیت لري، چې هره ورځ ترې په زیاته اندازه د چرګانو غوښه، هګۍ او نور د هېوادوالو ته وړاندې کېږي .
په دې غونډه کې د حبیب حسام پولټري کمپلیکس مشر عزیزالله حسام د کرنې وزارت، ننګرهارولایتي ادارې او کانال شرکت څخه مننه وکړه، چې ورته يې د فعالیت او پانګونې زمینه برابره کړې.
 ښاعلی حسام وویل، چې په دې فابریکه کې د ۳۰ زره نسلي چرګانو روزنې لپاره يې نوی ودانې جوړه کړې، چې راتلونکي کې به په هېواد کې د ننه د مارکېټ غوښتنې پوره کړي او د بهرنیو وارداتو مخه به ونیسي.
 د يادونې ده، چې په دغه فابريکه کې نږدې ۴۵۰ کسان کار کوي.