د ننګرهار کانال شرکت په ۵۰ جریبه ځمکه کې د مالټو بڼونه جوړېږي
٢۷ لیندۍ ۱۴۰۲ه.ش
۵ جُمَادَى الثاني ۱۴۴۵ ه.ق
د ننګرهار کانال شرکت چارواکي وایي، چې ددې شرکت د درېیم فارم ۹۴ نمره ځمکه کې ۵۰ جریبه دمالټو بڼونه جوړېږي.
د مالټې یاد بڼونه د خصوصي سکټور په همکارۍ جوړېږي، چې ورسره لسګونو کسانو ته په نېغه او سلګونو نورو کسانو ته په نا نېغه ډول د کار زمینه برابرېږي.
د چارواکو په خبره د تېرو دوو کلونو په ترڅ کې د ننګرهار کانال شرکت کې ۱۸ زره او ۲۰۰ جریبه د مالټو نوې بڼونه جوړ شوي دي، چې ورسره په دې ولایت کې د سټرویو د حاصلاتو کچه هم زیاته شوې ده.
د ننګرهارکانال دسټروسو حاصلات چې د لوړ کیفیت لرونکي دي د پلازمینې کابل سربېره دهېواد نورو ولایتونو ته هم صادریږي.
د مالټې د دغو بڼونو جوړولو موخه هېواد د سټروسو مېوو له اړخه پر ځان بسیا کول او په ټوله کې د سټروسو بڼونو ترویج او خلکو ته د کار زمینه برابرول دي.
د افغانستان ختیځ ننګرهار، لغمان او کونړ ولایتونه مدیتراني اقلیم او د مالټو، نارنج او لیمو بڼونو لپاره مناسبه هوا لري، چې هر کال له یادو ولایتونو څخه په زرګونه ټنه د سټرسو حاصلات راټولېږي.
