د ننګرهار چپرهار کې د اوبولګولو د یوې پروژې چارې بشپړ او ګټې اخیستنې ته وسپارل شو
د ننګرهار د کرنې، اوبولګولو او مالدارۍ ریاست د ملګرو ملتونو پراختیایي ادارې په مالي او د د کلیوالي پراختیا پروژې په تخنکي همکارۍ ددې ولایت د چپرهار په ولسوالی کې د اوبولګولو د یوې پروژې رغنیزې چارې بشپړ او ګټې اخیستنې ته سپارلی دی.
د ننګرهار دکرنې، اوبولګولو او مالدارۍ رییس مولوی عبدالستار محمد وویل، چې د چپرهار په ولسوالی کې د ٤.٥ میلیونه په ارزښت د یو کانال او سربند د جوړیدو چارې بشپړ شوي دي؛ چې په کې ٨٣٦ متره اوږدوالې لري او یو پولچک، ۴ د اوبو د سرعت کمولو ساختمانونه، ۹ د اوبو د کنټرول دروازې په کې شامل دي.
د ننګرهار دکرنې رییس وویل، چې ددې پروژې په بشپړېدو سره به ٩٠٠ جریبه کرنیزه ځمکه خړوبه او زرګونو خلکوته به د کار زمینه هم برابره شوې ده.
د مولوی عبدالستار محمد په خبره ددې پروژې په رغینزو چارو کې ٦٠٠ فني او غیر فني کاریګرو ته د کار زمینه هم برابره شوې وه.
په همدې حال کې د سیمې اوسیدونکو د یاد کانال په جوړیدو خوښي وښوده او دننګرهارد کرنې، اوبولګولو او مالدارۍ ریاست او پروژی له مسولینو څخه مننه وکړه.
باید وویل شي، چې دکلیوالي پراختیا پروژه د کوکنارو یوه بدیله پروژه ده، چې دکانالونو جوړولو ترڅنګ د بڼوالۍ، شنوخونو جوړولو، کرنیزو وسایلو او ګڼو نورو برخو کې د بزګرانو لاسنېوي کوي.
