د ننګرهار په ۷ ولسوالیو کې د څارویو د واکسین کمپاین پیلېږي
د ننګرهار دکرنې، اوبولګولو او مالدارۍ رییس مولوی عبدالستار محمد د خپل کار په دفتر کې، د ملګرو ملتونو د خوړو او کرنې ادارې (FAO) د ختیځ زون سیمه مسؤل خوشحال آصفي او د ختیځ لبنیاتو ټولنې مسؤل سره وکتل.
ددې کتنې پر مهال ښاغلی آصفي یادونه وکړه، چې له څو میاشتو راهسي ددې ولایت په یوشمېر ولسوالیو کې د څارویو د پوستکې ناروغي (لمپي سکین) خپره شوې ده، دغه اداره په پام کې لري، چې د ختیځ لبنیاتو ټولنې اړوند د ۷ ولسوالیو (بهسود، چپرهار، غني خېل، سرخرود، بټي کوټ، کوزکونړاو کامې) مالدارانو ته چې یادې فابریکي ته د پروسس لپاره شیدې ورکوي حیواناتو ته یې د ذکر شوي ناروغۍ د مخنیوي په موخه د واکسین د تطبیق کمپاین پیل کړي.
آصفي زیاته کړه، چې د یو ورځنۍ ورکشاپ د دایرېدو څخه وروسته به پر څارویو ۲۰ زره دوزه واکسین تطبیق شي، تر څو د څارویو د پوستکې ناروغۍ مخنیوي وشي او تر څنګ يي د مالدارانو اندېښنه لري شي.
په همدې حال کې د ننګرهار دکرنې رییس مولوی عبدالستار محمد د واکسینو د کمپاین د پلي کېدو څخه خوښي څرګنده کړه او په دغه برخه کې يي د هر راز همکارۍ ډاډ ورکړ.
