د ننګرهار وادي کرنیز امارتي شرکت اجاره لرونکي کروندګر د خپلو عوایدو له ډېرېدو خوشحاله دي
۲۸ لېندۍ ۱۴۰۳ه.ش
۱۶ جُمَادَى الثاني۱۴۴۶ه.ق
د ننګرهار وادي کرنیز امارتي شرکت یو شمېر اجاره لرونکي کروندګرو، چې پر خپلو ځمکو یې مالټې او تازه سبزیجات کرلي دي، وايي چې له خپلو کروندو څخه یې د پام وړ عاید ترلاسه کړی دی.
کروندګر وايي: چې د مالټو باغونو ترڅنګ یې په خپلو ځمکو ګلپي، توربانجان، سرې او سپینې ملۍ، کرم، پالک، ټیپر، ګازرې او نور سبزیجات کرلي دي. د دوی په وینا، دغه سبزیجات نه یوازې د جلال اباد ښار بازارونو ته وړاندې کېږي، بلکې پلازمینې کابل او نورو ولایتونو ته هم لېږل کېږي، چې ورسره د هغوی د عایداتو کچه لوړه شوې ده.
ننګرهار د افغانستان له هغو ولایتونو څخه دی چې پکې د کرنې پراختیا ته ځانګړې پاملرنه شوې ده. د ننګرهار وادي کرنیز امارتي شرکت د کروندګرو ملاتړ لپاره د اړینو اسانتیاوو په برابرولو سره هڅه کړې چې د ځمکې حاصلات زیات او د کروندګرو اقتصادي وضعیت ښه کړي.
