د ننګرهار مرستيال والي د کرنې ریاست کارکوونکو ته:ولس سره ښه چلند وکړئ
۲۰ تله ۱۴۰۲ه.ش
۲۷ ربیعالاول ۱۴۴۴ ه.ق
د ننګرهار مرستيال والي مولوي سعيد احمد بنوري د يو شمېر مسئولينو په ملتيا د ننګرهار دکرنې، اوبولګولو او مالدارۍ رياست له چارو څخه ليدنه او څارنه وکړه.
نوموړي د يادې ادارې مسئولينو او کار کوونکو سره په ناسته کې دوی ته د خپلمنځي همغږۍ او همکارۍ سپارښتنې وکړې او ورته يې لارښوونه وکړه، چې په ښار او ولسواليو کې خپلې چارې په شفاف ډول پرمخ يوسي.
ده دغه راز د يادې ادارې مسئولينو ته لارښوونه وکړه، چې ولسي وګړو په ځانګړي ډول بزګرانو، بڼوالو او مالدارانو سره ښه چلند وکړي، کارونه ورته اسانه او لازمې اسانتياوې رامنځته کړي.
د ننګرهار مرستيال والي يادو مسئولينو ته د ځنګلونو قطع مخنيوي، د مسئولیتونو په ښه ډول تر سره کولو، د اوامرو تطبیق، د چارو په ايماندارۍ او صداقت تر سره کولو او نورو برخو کې لارښوونې وکړې.
په ورته وخت کې د يادې اداري مسئولینو د ننګرهار مرستيال والي ته د دې ادارې د تشکيل، دندو او مسئولیتونو په برخه کې معلومات ورکړل همدا راز يې ډاډ ورکړ چې هدايات به يې تعقيب او عملي کړي.
