د ننګرهار دکرنې رییس د یوشمېر همکارو مؤسسو له چاراکو سره وکتل
۲۸ چنګاښ ۱۴۰۲ه.ش
۲ مُحَرَّمُ الحَرام ۱۴۴۵ه.ق
د ننګرهار دکرنې، اوبولګولو او مالدارۍ رییس مولوی عبدالستار محمد د ملګرو ملتونو دخوړو او کرنې ادارې، ډاکار او اکشن آیډ مؤسسې له چارواکو سره په کتنه کې د دوی د نویو پروژو پر تړاو خبرې اترې وکړې.
په دې غونډه کې په ختیځ زون کې د ملګرو ملتونو د خوړو او کرنې ادارې مسول خوشحال اصفي وویل: «ننګرهار کې ۱۳ سوه مټریک ټنه د غنمو اصلاح شوي تخمونه پر بزګرانو وېشو، چې د ۱۵ زره بزګرانو سروې بشپړه شوې او د پاتې ۱۰ زره بزګرانو سروې ډېر ژر پیلوو، ۱۱ ولسوالیو کې د کار په بدل کې د نغدو پیسو پروګرام لرو، د سبو اصلاح شوی تخمونه، شاتو مچیو ترویج ، وړې شني خونې جوړول، دسویابین تخمونو ورکړه او ۱۵۰۰ تنو ته د کورنیو چرګانو ورکړي پروګرامونه لرو ».
همدارنګه د ډاکار مؤسسې استازی، هم د کرنې او مالدارۍ په برخه کې خپل نوې پروژې او د بدیل معشیت د پروګرامونو دپیل خبر ورکړ.
د ننګرهار دکرنې، اوبولګولو او مالدارۍ رییس مولوي عبدالستار محمد د یادو پروژو او مؤسسو چارواکو ته د هر راز همکارۍ ډاډ ورکړ.
