د ننګرهار دکرنې ریاست: لسګونه جریبه ځمکه له غاصبینو بېرته راګرځول شوي دي

۲۶  لېندۍ ۱۴۰۱ه‍.ش
۲۳ جمادي اﻷول ۱۴۴۴ ه‍.ق
د ننګرهار دکرنې، اوبولګولو او مالدارۍ ریاست چارواکي وایي، چې د دوی موندنې ښيي، چې ددې ولایت په کچه ۴۸۵ زره جریبه دولتي ځمکې غصب شوي دي، چې له دې ډلې په دې وروستیو کې اسلامي امارت لسکونه جریبه ځمکه له غاصیبونو څخه بېرته راګرځولي .
داخبره د ننګرهار ولایت د کرنې، اوبولګولو او مالدارۍ او پدې ولایت کې د دولتي غصب شویو ځمکو د خلاصون د تخنیکي ټیم مشر مولوي عبدالستار محمد د یاد ټیم په نوبتې غونډه کې وکړې نوموړی وویل: «د هېواد په کچه د امیر المومنین حفظ الله په لارښوونه د هېواد په مرکز کې یو با صلاحیت کمیسیون جوړ شوی، چې په ولایاتو کې هم د دولتي غصب شوو ځمکو د خلاصون په موخه تخنیکي ټیمونه جوړې شوي، چې په ننګرهارولایت کې هم د یولسو ادارو څخه تخنیکي ټیم چې په کې کرنه او مالدارۍ ریاست، عدلیه، څارنوالي، امنیې قومندانۍ، حج او اوقاف، ښاروالۍ، ښارجوړونۍ، کاراو ټولنیزو چارو ریاست، قضاء امارت او کادستر ادارو استازي غړیتوب لري.»
نوموړی وویل په ننګرهار ولایت کې یاد تخنیکي ټیم د لاسته راوړنو  او معلوماتو پر بنیاد د دې ولایت مرکز جلال اباد ښار او ولسوالیو کې ۴۸۵ زره جریبه دولتي ځمکه غصب شوي چې د بېرته ګرځولو لپاره يې موږ جدي هلې ځلې پیل کړي، چې له نېکه مرغه تردې دمه موږ په لسګونه جریبه غصب شوي ځمکي د غاصیبونو له منګولو خلاصې کړي او ټولو امارتي ادارو ته مو لارښوونه کړئ، ترڅو هیچاته پرته له اسنادو دولتي ځمکو کې د ودانیو د جوړولو او په یو نوم او بل نوم په یادو ځمکو کې د کار کولو اجازه ورنکړي . 
د ننګرهار دکرنې رییس دا هم وویل، چې د اسلام مبارک دین د ارشاداتو له نظره په غصب شوو ځمکو کې که څوک جومات هم جوړکړي په هغه کې لمونځ نه کېږي او هر هغه څوک چې ځمکه غصب کړي د ځمکې اوه طبقې به د قیامت په ورځ د هغه په غاړه کې  پروت وي.
په پروګرام کې د یاد تخیکي ټیم غړو د خپلو کړنو او اجرااتو راپور هم د غونډې برخوالو ته وړاندې کړل، چې د راپور د اوریدو وروسته د یاد تخیکي ټیم مشر له لوري هر یو ته لازمې لارښوونې او سپارښتنې وشوې .