د مالدارۍ سکټور پیاوړتیا په پار هڅې؛ ننګرهار کې د شېدو ټولولو ۲۵ مرکزونه جوړ شو
١۸ غویی ۱۴۰۳ه.ش
٢۸ شَوّال المُکَرَّم ۱۴۴۵ه.ق
د ننګرهار د کرنې، اوبولګولو او مالدارۍ ریاست سره په همغږۍ د افغان ځوانانو خدماتي مؤسسې په تخنیکي همکارۍ او په ملګرو ملتونو کې د مېرمنو چارو ادارې په مالي لګښت په خوږیاڼو، شېرزاد، دره نور او کامي ولسوالېو کې د شیدو ټولولو ۲۵ مرکزونه جوړ شوي دي.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، چې په یادو شویو ولسوالیو کې د افغان ځوانانو خدماتي مؤسسې له لورې ۲۵ د شیدو ټولولو مرکزونه جوړشوي دي.
د ننګرهار دکرنې رییس وویل: «یادو مالدارانو ته د شېدو راټولولو کوم مرکزونه چې جوړ شوي دي ددغو مرکزونو مشرانو ته د شېدو ټولولو توکي لکه د شېدو راټولولو غټ ۵۰ ليټره کین، پلاستیکي سطل، برقي تله، شېدو اندازه کولو لوښې، لکټو مټر، ماسک، دستکشې، جالۍ او د شېدو ګرمولو دیګونه هم ورکړ شوي او هغه مالداران چی شيدي مرکزونو ته د پلور لپاره راوړي پلاستکي سطل، پلاستکي څوکۍ، پنير جوړولو جالۍ، شېدو چاڼولو جالۍ، ماسکونه، دستکشې، تملوت، د شېدو غواګانو د شېدو د کيفت د ښه والی لپاره دوه قلمه درمل ورکړل شوي دي.»
دغه راز ۹۰۰ تنو مالدارانو ته د لبني محصولاتو ارزښت، پروسیس، حفظ الصحي او حيوانې ناروغیو او نورو برخو کې روزنه هم ورکړل شوې ده.
د یادو مرستو موخه په ننګرهار کې د مالدارۍ سکټور پیاوړتیا، مېرمنو ته په کور دننه د کار پیداکول او د خوړو خوندیتوب دی.
