د مالدارۍ سکټور خوندیتوب په پار هڅې؛ د کونړ په څلور ولسوالۍ کې د وټرنرۍ کلینیکونه ګټې اخیستنې ته وسپارل شول
۲۸ چنګاښ ۱۴۰۲ه.ش
۲ مُحَرَّمُ الحَرام ۱۴۴۵ه.ق
د کونړ دکرنې، اوبولګولو او مالدارۍ ریاست چارواکي وایي، چې په دې ولایت کې مالدارانو ته د چوپرړتیاوو وړاندې کولو او په ټوله کې د مالدارۍ سکټور د ودې او خوندیتوب د هلوځلو په دوام د کرنې د پراختیا نړیوال صندوق په مالي او د افغانستان لپاره د هالنډ کمېټې په تخنیکي همکارۍ ددې ولایت په څلورو ولسوالیو شیکل، چپه دره، څوکۍ او شلتن کې د وټرنرۍ څلور کلینیکونه جوړ او ګټې اخیستنې ته سپارلي دي.
د یادو کلینیکونو د ګټې اخیستنې په مراسمو کې د کونړ والي مولوی قدرت الله ابوحمزه، د کونړ د کرنې رییس مولوی شېر آقا (پیر حبیب الرحمن)،د کونړ د کرنې ریاست چارواکو، د یاد ولسوالیو چارواکو، د افغانستان لپاره د هالنډ کمېټې استازو او یوشمېر نورو چارواکو ګډون درلود.
د کونړ دکرنې رییس مولوی شېرآقا (پیر حبیب الرحمن) وويل، چې د کونړ ولایت د شیکل، چپه دره، څوکۍ او شلتن ولسوالیو کې ډېر شمېر څاروي د څارویو د خدماتو بي برخي وو، چې ددي کلینیکونو په جوړولو سره د درملو ترڅنګ واکسینونو، درملنې او لازمو مشورو سره د مالدارۍ سکټور کې به مثبت بدلونونه ولیدل شي.
د کونړ دکرنې رییس دغه راز زياته کړه څلور تنو ته د شپږو میاشتو لپاره د مالدارۍ او وترنرۍ خدمتونو په برخه کې روزنه هم ورکړل شوې ده.
د کونړ دکرنې رییس دغه راز وویل، چې دیادو کلنیکونو لپاره یو عراده هونډا موټر سایکل، یو پایه سولري یخچال، مکمل سولري سیستم، ۶۶ قلمه د وترنري تخنیکي بسته، ۳۳ قلمه لوجستیکي بسته او ګڼ نور وسایل ورکړل شو، ترڅو مالدارانو ته ښه او بهتره خدمات وړاندې کړي.
