د لوګر په ازرې ولسوالی کې د ۴۷ کیلو متره سړک هموارولو او جغل اچولو چارې پیل شوې
۲۶ چنګاښ ۱۴۰۱ ه.ش
۱۸ ذوالحجَّة ۱۴۴۳ ه.ق
د لوګر دکرنې، اوبولګولو او مالدارۍ ریاست چارواکي وایي، چې ددې ولایت اړوند د ازرې ولسوالی کې د ۴۷ کیلو متره سړک د هوارولو او جغل اچولو چارې پیل شوي دي. یاد سړک د کار په بدل کې د غنمو د ورکړې پروژې له لارې بیارغول کېږي.
په دې اړه جوړه شوې غونډه کې د ازرې ولسوالی ولسوال مولوی ولي الله طارق، د کرنې ریاست استازی محمد اصغر کوچی، امنیه قومندان مولوی فیصل ذاهد، د استخباراتو مدیر شهامت، د مرکز څخه پنځهګوني ټاکل شوی کمېټې غړو او د شرکت ریس مولوي محمد یعقوب پادخوابی شتون درلود.
یاد سړک له لټکوري څخه پیل تر کوزې چوترې پورې غځېدلی دی، چې کاري چارې یې خصوصي شرکت ته وسپارل شول.
نوموړی سړک به د درې میاشتو په موده کې ګټې اخستنې ته وسپارل شي.
