د لغمان مرکز مهترلام کې د کانال او سربند رغنیزې چارې پیل شوې

د لغمان د کرنې،  اوبولګولو او مالدارۍ ریاست د ملګرو ملتونو پراختیایي ادارې«یو،ان،ډي،پي» په مالي او د سولې بنسټ په تخنکي همکارۍ ددې ولایت د مرکز مهترلام اړوند ده ملخ کلي کې د اوبولګولو د یوې پروژې رغنیزې چارې پیل کړي دي.
ددې پروژې په پیل غونډه کې د لغمان والي الحاج قاري زین العابدین عابد، دکرنې، اوبولګولو او مالدارۍ رییس مولوی محمدولي محسن، د اقتصاد رییس مولوی جان محمد حامد، د سولې بنسټ مؤسسې ولایتي مسوول محمدحارث رضاء، د سیمې قومي مشرانو او بزګرانو ګډون کړي ؤ.
دیادې پروژې په پرانیست غونډه کې د لغمان والي قاري زین العابدین عابد په ټولو کورنیو او بهرنیو مؤسساتو او پانګولو غږ وکړ چې په لغمان کې امنیت بشپړ د ډاډ وړ دی، دوی کولای شي چې پروژې پلي کړي. 
همداراز د لغمان والي د سولې بنسټ تطبیق کوونکې مؤسسې مسؤلینو ته سپارښتنه وکړه، چې په کیفیت سره  یاده پروژه گټې اخیستنې ته وړاندې کړي.
په همدې حال کې د لغمان دکرنې، اوبولګولو او مالدارۍ رییس مولوی محمد ولي محسن وویل، چې د لغمان مرکز مهترلام ده ملخ کلي کې د اوبولګولو ددې پروژې ټولیز لګښت ۷۱ زره امریکايي ډالرو ته رسېږي، چې په دې پروژه کې د ۱۱۳۵ متره په اوږدوالي کانال او ۵۶ د اوبو دکنټرول دروازې جوړول  شامل دي.
د لغمان دکرنې رییس په خبره ددې پروژې په بشپړېدو سره به ۳۰۰ جریبه کرنیزه  ځمکه په نېغه او ۶۵۰ جریبه ځمکه په نانېغه ډول  خړوبه او سلګونو ځایې خلکو ته به د کار زمینه هم برابره شي.
ددې کانال په رغنیزو چارو کې ۳۵-۱۰۰ تنو ته د کار زمینه برابره شوي؛ چی د ۷۸ کاري ورځو په موده کې به دکانال چارې بشپړې او کټې اخیستنې ته به وسپارل شي. 
په همدې حال کې د سیمې اوسیدونکو د یاد کانال په جوړیدو خوښي وښوده او دلغمان د کرنې، اوبولګولو او مالدارۍ ریاست او پروژې له مسولینو څخه مننه وکړه.