د لغمان د کرنې رییس په مشرۍ د ځنګلونو د ساتنې کمېټې د همغږۍ ناسته وکړه
۹ لړم ۱۴۰۳ه.ش
۲۷ رَبِیعُ الْثاني ۱۴۴۶ه.ق
د لغمان د کرنې، اوبولګولو او مالدارۍ رییس مولوي عبدالستار محمد په مشرۍ د ځنګلونو د ساتنې، بیارغونې او د محصولاتو څخه د موثرې استفادې کمېټې غړو خپله د همغږۍ ناسته وکړه. دغه ناسته د ولایت مقام، امنیه قوماندانۍ، استخباراتو، قولې اردو او لېوا او د علماؤ شورا ریاستونو د استازیو په ګډون د ځنګلونو د ساتنې او بیارغونې په موخه جوړه شوه، چې د قرآن کریم په تلاوت سره پیل شوه.
مولوي عبدالستار محمد وویل: "د افغانستان اسلامي امارت د کابینې د پرېکړې پر اساس، یو پلاوي د ځنګلونو د ساتنې، بیارغونې او محصولاتو څخه د غوره او موثرې استفادې په موخه څو ورځې وړاندې لغمان ته سفر کړی وو. دغه پلاوي د لغمان والي سره ناسته وکړه او د کاري کمېټې د رامنځته کولو سپارښتنه یې وکړه."
هغه زیاته کړه: "دغه ولایت پنځه ولسوالۍ لري، چې هره ولسوالۍ یې د طبیعي ځنګلونو درلودونکې ده. د اسلامي امارت د کابینې د پرېکړې او د وزیر صاحب په لارښوونه، دغه کمېټه به خپل کاري سفرونه ټولو ولسوالیو ته وکړي." کمېټه به په هره ولسوالۍ کې د ځنګلونو د ساتنې او بیارغونې په موخه ولسونو ته معلومات ورکوي، شوراګانې او ګروپونه به جوړوي او د ولسونو ستونزې او غوښتنې به اوري.
د ناستې په پای کې، د کمېټې غړو د چارو د ښه ترسره کېدو لپاره خپل نظرونه د کرنې رئیس سره شریک کړل او د کاري سفرونو لپاره پلان ترتیب شو. د پلان له مخې، کمېټه له سبا څخه ولسوالیو ته خپل سفرونه پیلوي.
