د لغمان د کرنې رییس د خوړو او کرنې نړۍوالې ادارې له چارواکو سره وکتل
د لغمان د کرنې، اوبولګولو او مالدارۍ رییس مولوي عبدالستار محمد د خپل کار په دفتر کې د خوړو او کرنې نړۍوال ادارې له بهرني او داخلي مسؤلینو سره ولیدل. په دې کتنه کې د خوراک او کرنې نړۍوالې ادارې بهرني کارکوونکي چینایي بوزو او یورو نایټو، د ختیځ زون مسؤل خوشحال اصفي او نور همکاران شامل وو.
د کرنې رییس مولوي عبدالستار محمد راغلي پلاوي ته ښه راغلاست ووایه او د یادې ادارې ترسره شوې پروژې یې مثبتې یادې کړې. هغه له پلاوي څخه د طبیعي زېرمو، اصلاح شویو تخمونو او کیمیاوي سرو، چک ډیمونو، ګرین هاوزونو، اړمنو کورنیو ته د نسلي غواګانو د وېش، د څارویو واکسینونو تطبیق، د کبانو فارمونو جوړول، د پروسس د وسایلو وېش، او نویو باغونو جوړولو په برخو کې د نوو پروژو د منظورېدو غوښتنه وکړه.
چینایي بوزو د غنمو او شولو فصلونو په اړه د کرنې ریاست له کارمندانو څخه خپل نظریات واخیستل او ډاډ یې ورکړ، چې د ریاست غوښتنو ته به د موجوده مالي امکاناتو په چوکاټ کې رسېدنه کوي. په ورته وخت کې، د خوړو او کرنې نړیوال سازمان د ختیځ زون مسؤل خوشحال اصفي وویل: چې دوی هڅه کوي د کرنې سکتور د پراختیا لپاره شته امکاناتو په کارولو سره د یاد ریاست غوښتنې پوره کړي. هغه زیاته کړه چې د لغمان لپاره څلور د کبانو حوضونه، پنځه ویشت ګرین هاوزونه، ۹۰چک ډېمونه او همدارنګه د بادپښ ولسوالۍ بزګرانو ته د غنمو اصلاح شویو تخمونو ۳۰۰ ونډې وېشل په پام کې لري.
په پای کې، د لغمان د کرنې رییس د خوړو او کرنې نړۍوال سازمان مسؤلینو ته د پروژو په تطبیق کې د هر اړخیزې همکارۍ ډاډ ورکړ.
