د قوشتېپې ستر او ملي کانال څخه د لوړپوړي پلاوي لیدنه
۸ غویی ۱۴۰۵ه.ش
۱۱ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزیر مولوي عطاءالله عمري په مشرۍ لوړپوړی پلاوی، د هېواد شمالي ولایتونو ته د سفر پر مهال د قوشتېپې ستر او ملي کانال له روانو چارو او بېلابېلو برخو لیدنه وکړه او د یادې ملي پروژې کاري پرمختګ یې له نږدې وڅاره.
په دغه پلاوي کې د چارو ادارې لوی رییس شیخ نورالحق انور، د ملي پراختیا شرکت اجرائیوي لوی رییس عبدالرحمن عطاش، د اوبو او انرژۍ وزارت د اوبو مرستیال مجیبالرحمن عمر آخندزاده، د اقتصادي معاونیت استازی مولوي احرار او د اړوندو ادارو یو شمېر متخصصین هم شامل وو.
مولوي عطاءالله عمري د لیدنې پر مهال د اوبو د سرچینو اغېزمن مدیریت د کرنې سکتور د پیاوړتیا لپاره یوه اساسي اړتیا وبلله او د ملي پراختیا شرکت روان فعالیتونه یې د هېواد په تاریخ کې مهم ګام یاد کړ. نوموړي همداراز ډاډ ورکړ چې د دې ملي پروژې په بشپړېدو کې به هر ډول اړینه همکاري ترسره شي.
له بلې خوا، شیخ نورالحق انور د قوشتېپې کانال روان کارونه د هېواد د پرمختګ لپاره ډېر مهم وبلل او په دې پروژه کې یې د ملي پراختیا شرکت د رهبرۍ هڅې د ستاینې وړ وبللې. نوموړي دا پروژه د اقتصادي ثبات او د هېواد د ځانبسیاینې په برخه کې یو بنسټیز بدلون وباله او د چارو ادارې د دوامدار ملاتړ ډاډ یې ورکړ.
همداراز عبدالرحمن عطاش د پلاوي له حضور څخه د مننې ترڅنګ ټینګار وکړ چې د ملي پراختیا شرکت تخنیکي ټیمونه په چټکۍ سره کار کوي، څو د پروژې پاتې برخې د ملي او نړۍوالو معیارونو سره سمې بشپړې شي او پروژه راتلونکو پړاوونو ته داخل شي.
د یادونې وړ ده، چې د قوشتېپې کانال د دویم فاز د کېندنې چارې بشپړېدو ته نږدې شوي او اوسمهال د کانال په مسیر کې پر ۲۸ پلونو او د اوبو پر کنټرولوونکو ساختمانونو کار روان دی، چې په بشپړېدو سره به یې د آمو سیند اوبه د فاریاب ولایت تر اندخوی ولسوالی ورسېږي.
په پای کې، د کرنې، اوبو لګولو او مالدارۍ وزیر د دې لیدنې پر مهال د کارونو پر چټکتیا او د پروژې د کیفیت پر ساتنې ټینګار وکړ او وړاندیز یې وکړ چې د کرنې سکټور د پیاوړتیا لپاره دې په جوزجان او فاریاب ولایتونو کې د څېړنیزو فارمونو جوړول هم په پام کې ونیول شي.
