د رنجوڼ غره د اورلګېدنې مهارولو په پار د لغمان دکرنې ریاست هڅې
۲۳ لیندۍ ۱۴۰۲ه.ش
۱ جُمَادَى الثاني ۱۴۴۵ ه.ق
د لغمان دکرنې، اوبولګولو او مالدارۍ ریاست وایي، چې د لغمان ولایت د رنجوڼ غره په ځنګل کې اورلګېدنه رامنځته شوې ده، چې د یادې اور لګېدنې رامنځته کېدو سره سم د کرنې ریاست مسؤلین پر وخت سیمې ته ورسېدل او د لا زیات تکثیر مخنیوی په پار یې اړوندو چارواکو ته لازمې سپارښتنې وکړې.
د لغمان دکرنې، اوبولګولو او مالدارۍ رییس الحاج مولوی محمد ولي محسن، د پېښو پر وړاندې د مبارزې رییس قاري خیر محمد غازي او د سیندیزې حوزې رییس مولوی شېرجان راشدي د اور لګيدنې سيمي ته لاړل او د اورلګېدنې د مهارولو په پار یې ولسونه منسجم کړل.
رنجوڼ غر چې له نورستان او دولت شاه ولسوالی سره وصل غر دی، یاد غر په جلغوزيو، نښترو، چهارمغزو او ډول ډول څېړيو پوښل شوی دی.
د لغمان دکرنې ریاست له ټولو هېوادوالو غوښتنه کوي، چې د طبیعي ځنګلونو په ساتنه او پالنه کې خپل اسلامي او انساني مسوولیت ادا کړي.
