د خوست ولایت مقام د کرنې رییس کړنې وستایلې؛ مولوي شیر محمد ذبیح ته ستاینلیک ورکړل شوه
۲۴ مرغومې ۱۴۰۴ه.ش
۲۴ رَجَب المُرَجَّب ۱۴۴۷ه.ق
د افغانستان اسلامي امارت د خوست ولایت مقام له لوري د اړوندو ادارو د ارزونې پر بنسټ، د خوست ولایت د کرنې، اوبو لګولو او مالدارۍ رییس مولوي شیر محمد ذبیح په ۱۴۰۴ کال کې د خپلو رسمي دندو د صادقانه، منظم او مسئولانه ترسره کولو، او په ځانګړي ډول په روان کال کې د مربوطه ادارې په عوایدو کې د ۴۰ سلنه زیاتوالي په برخه کې د اغېزمنو هڅو له امله وستایل شو.
د معلوماتو له مخې، نوموړي د نافذه قوانینو او مقرراتو په رڼا کې، د ولایت مقام او مستوفیت سره په نږدې همغږۍ د عوایدو د راټولولو بهیر په ښه ډول تنظیم کړی، چې له امله یې د ولایت مالي نظام لا پیاوړی شوی او په مجموع کې د امارتي عوایدو د راټولولو په برخه کې مهم او اغېزمن ګامونه اخیستل شوي دي.
د همدې هڅو د قدردانۍ په موخه، د خوست ولایت مقام او مستوفیت له لوري مولوي شیر محمد ذبیح ته ستاینلیک ورکړل شوه، تر څو د نوموړي د خدمتونو ستاینه وشي او دا چاره نورو دولتي مسئولینو ته هم د لا ښه خدمت او لا زیاتو هڅو لپاره د هڅونې لامل وګرځي.
