د خوست ولایت فموکیشن مرکز څخه لیدنه وشوه
۶ مرغومې ۱۴۰۳ه.ش
۲۴ جُمَادَى الثاني۱۴۴۶ه.ق
د خوست ولایت کرنې، اوبو لګولو او مالدارۍ ریاست د کرنیزو چارو آمر مولوي اسلم خان منیب او د ترویج کارمند نظیف الله د فموکیشن مرکز څخه لیدنه وکړه.
په یاد مرکز کې پر هغو مېوو او سبزیجاتو چې بهر ته صادرېږي، کیمیاوي درمل کارول کېږي، ترڅو د فنګسي ناروغیو انتقال مخه ونیول شي. دغه پروسه د سوداګرو او بزګرانو لپاره په نړیوال بازار کې د باور ساتلو او په ښه بیه د محصولاتو د پلور تضمین کوي.
مولوي منیب د مرکز فعالیتونه مثبت او منظم وارزول، شته اسانتیاوې یې کافي وبللې، او د لږو موجودو نیمګړتیاوو د حل لپاره یې اړینې لارښوونې وکړې.
یادونه کېږي چې د فموکیشن مرکز موخه د صادراتي مېوو او سبزیجاتو کیفیت ساتنه او د سوداګرۍ نړیوالو معیارونو پوره کول دي.
